Rrena se vëllai i Liridona Ademajt deklaroi se do të marrë gjakun e motrës

Deklarate Tronditse: Dua te mar gjakun e motres, vellau i Liridona Ademaj femijeve po u qan zemra / shiko videon e plote ne komentin e pare

Më 29.03.2024 faqja në Facebook ‘Tringa Globale’ (arkiva) ka publikuar një artikull me titullin: “Deklarate Tronditse: Dua te mar gjakun e motres, vellau i Liridona Ademaj femijeve po u qan zemra / shiko videon e plote ne komentin e pare”.

I njëjti artikull është publikuar edhe në faqet tjera në Facebook, si: Lajme Javore (arkiva), Lajme nga Bota (arkiva), Liria Ka Emër (arkiva), BOTA SOT (arkiva), Lajme info (arkiva), Lajme Ditore (arkiva), Shqiptaria Ka Emër (arkiva), Gazeta Rich Shqip (arkiva), Portali Aurora (arkiva), Aktuale 24 (arkiva), Desi Neës(arkiva), Mesazhi(arkiva), Lajm24 (arkiva), A1on Lajme (arkiva), Maringlen (arkiva).

“Me marrë gjakun”, bazuar në Kanun (dokument i të drejtës tradicionale/zakonore të shqiptarëve) nënkupton me bë vrasje në familjen e një dorasi. Por, numri i vrasjeve për gjakëmarrje kishte rënë dukshëm që nga fillimi i viteve të 90-ta kur Anton Çeta u nisi aksioni e faljes së gjaqeve.

Krypometër ka kontaktuar me Leonard Ademajn, vëllain e Liridona Ademajt, për të parë nëse në kohën e publikimit, pra më datë 29.03.2024, ai kishe deklaruar “dua të marrë gjakun e motrës”.

Ademaj deklaroi se nuk ka dhënë deklaratë të tillë gjatë atyre ditëve.

“Nuk ka diçka të tillë, sikur të kam treguar më parë, ne nuk kemi dhënë asnjë deklaratë. Për çdo deklaratë timen e të familjes dal publikisht”- deklaroi Ademaj për Krypometrin.

Liridona Ademaj është vrarë më 29.11.2023. Fillimisht rasti u raportua si grabitje me pasojë vrasje, ndërsa më pas vepra u rikualifikua në vrasje të rëndë, pasi që Prokuroria tha se ngjarja ishte inskenuar.

Naim Murseli, bashkëshorti i Liridona Ademajt, është arrestuar nga Policia e Kosovës pasi Prokuroria ka ngritur dyshimet ndaj Murselit se kishte porositur vrasjen e bashkëshortes. 

Në anën tjetër, përveç Murselit, të arrestuar janë edhe Granit Plava që dyshohet se ishte ekzekutori dhe Kushtrim Kokalla që dyshohet se ishte personi që vuri në kontakt Naim Murselin dhe Granit Plavën. 

Të tre të dyshuarit janë nga Gjakova. Dosja e Prokurorisë përmendë rolet e të tre të dyshuarëve në vrasjen e Liridona Ademajt më 29 nëntor 2023. 

Vëllai i Liridona Ademajt, Leonard Ademaj kishte deklaruar se nuk kanë pasur asnjë indikacion se Liridona Ademaj kishte probleme familjare. Ademaj, në paraqitjet e tyre publike, kishin deklaruar disa herë se i besojnë drejtësisë dhe presin që të merren vendime meritore për dënimin e përgjegjësve për vrasjen e Liridona Ademajt.