Ilustrim
Pretendimi se një kremë shëron mykun e thonjëve
Deklarata
“Myku i thonjve shkakton infeksion në gjak dhe nekrozë”
Vlerësimi
Rrenë
Publikimi me titull “Myku i thonjve shkakton infeksion në gjak dhe nekrozë” është i pavërtetë. Krypometër ka verifikuar me burime shkencore se myku nuk shkakton këtë problem ndërsa trajtimi i tij me produktet të cilat i reklamon artikulli nuk janë të certifikuara në Kosovë.
Artikulli
Më 7 dhjetor faqja e facebook-ut, ‘Sheryl Chapman’ (arkiva) ka publikuar një artikull me titull, Specialistët paralajmërojnë: “Myku i thonjve shkakton infeksion në gjak dhe nekrozë. Ekziston një zgjidhje, por nuk është për të gjithë”.
I njëjti artikull është shpërndarë edhe në ueb faqen ‘kfodjeos.com’(arkiva).
Në këtë artikull rekomandohet një produkt për të cilin pretendohet se shëron mykun e thonjëve, pasi që artikulli pretendon se personat që infektohen me myk vdesin brenda 10-14 vjetëve.
Krypometër ka kontrolluar nëse ky produkt ka autorizim marketingu në Kosovë në Agjencinë e Kosovës për produkte dhe pajisje medicinale.
Në listën e produkteve me Autorizim për Marketing në Republikën e Kosovës, nuk gjendet asnjë produkt me emrin ‘Mikoherb’.
Përveç kësaj, Krypometër ka pyetur edhe dy doktorë të përgjithshëm rreth rrezikut prej mykut të thonjëve.
Fevzi Sylejmani që është edhe drejtor i QKMF-së në Mitrovicë ka thënë për Krypometër se myku i thonjëve nuk shkakton vdekje.
“Myku i thonjëve shërohet me tableta antibiotike te rastet e neglizhuara për një kohë të gjatë, ndërsa tek rastet e lehta me ndonjë kremë. Ndonjëherë nevojitet largimi i thonjve tek kirurgu por kjo ndodh shumë rrallë”- thuhet në përgjigjen e Sylejmanit të datës 11/12/2023.
Ndërsa mjeku i QKMF-së në Lipjan, Krenar Berisha, tha se këto janë propagandë për të shitur krema të ndryshme.
“Ka shkrime për vdekje nga myku i thonjëve por jo ndonjë publikim shkencor. Më shumë janë propagandë për përdorimin e sprejëve dhe kremave të ndryshëm për trajtim. Por trajtimi i mykut të thonjve bëhet me anë të antibiotikëve”- thuhet në përgjigjen e Berishës të datës 11/12/2023.