Përçarje në LDK Përpara Zgjedhjeve në Kosovë

Ndërsa Kosova përgatitet për një palë zgjedhje të tjera të parakohshme më 11 qershor, pas shpërbërjes së koalicionit qeverisës kohëve të fundit – të përbërë nga Partia Demokratike e Kosovës, PDK dhe Lidhja Demokratike e Kosovës, LDK – ndarjet brenda LDK-së po rriten dhe kërcënojnë të minojnë rezultatet e zgjedhjeve.

Përçarje, të cilat filluan të shfaqen në parti disa vite më parë, u zgjeruan pasi disa zyrtarë të partisë kryesore të cilët në të kaluarën guxuan të kundërshtonin dhe kritikonin kreun e LDK-së, Isa Mustafa ose u reduktuan ose u përjashtuan plotësisht nga lista e kandidatëve të partisë.

Ekspertët thonë se Mustafa, tani 66 vjeç, synon të përdorë zgjedhjet e ardhshme për të forcuar pozicionin e vet dhe të anashkalojë disa kundërshtarë kryesorë.

Mustafa ka vendosur të mos kandidojë përsëri për postin e kryeministrit dhe në vend të kësaj ka emëruar ish-Ministrin e Financave, Avdullah Hoti, një aleat i ngushtë.

Ndërkohë, disa zyrtarë të lartë të LDK-së që e kundërshtuan ose e kritikuan atë në të kaluarën – si Adem Salihaj, Hatim Baxhaku apo Shpejtim Bulliqi – janë përjashtuar nga lista e kandidatëve të LDK-së.

Një zyrtare tjetër e lartë epartisë, Vjosa Osmani – deputetja e LDK-së e cila fitoi shumicën e votave në zgjedhjet e vitit 2014 dhe e cili u pengua nga sfidimi i Mustafës për udhëheqjen e partisë në konventën e LDK-së të vitit 2015 – u vendos në listë vetëm në momentin e fundit, pak para se procesi të mbyllej dhe vetëm pas protestave të ashpra nga ana e opinionistëve dhe aktivistëve të LDK-së.

Megjithatë, ajo ishte hedhur në fund të listës, në pozitën 81, nga 110 kandidatët e LDK-së.

Qartësisht e pakënaqur, Osmani të martën ka postuar “Jo 81” në profilin e saj në Facebook, duke shkruar: “Mbani mend këtë numër”, duke sinjalizuar gatishmërinë e saj për të vazhduar luftën.

Koalicioni me PDK-në Krijoi Përçarjet e Para

Përçarjet brenda LDK-së u shfaqën në nëntor të vitit 2014, kur udhëheqësi i saj, Mustafa, pranoi të hyjë në koalicion me rivalin e tyre kryesor, Partinë Demokratike të Kosovës, PDK.

Këto përçarje janë përkeqësuar si rezultat i stilit autokratik dhe intolerancës së mendimeve alternative të Mustafës.

Marrëveshja PDK-LDK përfshinte ndarjen e posteve me të cilat LDK-ja mori pozitën e kryeministrit, ndërsa PDK-ja mori kryesuesin e Parlamentit dhe presidencën.

Marrëveshja i dha LDK-së një mundësi për të udhëhequr qeverinë për herë të parë që nga viti 2002, kur ekzekutivi i parë i Kosovës u formua në bazë të zgjedhjeve të lira dhe shumëpartiake.

Megjithatë, disa deputetë të LDK-së u rebeluan kundër vendimit të liderit të tyre dhe refuzuan të votonin për marrëveshjen e koalicionit.

Kadri Veseli u zgjodh kryetar i parlamentit më 8 dhjetor 2014, me 71 vota për dhe 44 kundër, ndërsa Mustafa dhe kabineti i tij u zgjodhën të nesërmen me 73 vota për dhe 38 kundër.

Në vitin 2016, kuvendi ka zgjedhur Hashim Thaçin e PDK-së si President të Kosovës, me 64 vota në raundin e dytë, pasi ai mori vetëm 50 vota në të parin.

Në të tre raundet, një numër i deputetëve të LDK votuan kundër marrëveshjes së koalicionit PDK-LDK.

Menjëherë pas zgjedhjes së kabinetit të tij, Mustafa i dërgoi një paralajmërim deputetëve nga partia e tij që nuk kishin votuar në favor të tij.

Duke falënderuar të gjithë ata që kishin votuar, ai tha se përfshinte “ata që votuan kundër [meje] dhe atyre që abstenuan, sepse është e drejta [autonome]e secilit të votojë. Natyrisht, kjo është e vlefshme për të gjithë ju [deputetët në përgjithësi], por jo për deputetët e Lidhjes Demokratike të Kosovës”.

Një ditë para votimit për kandidaturën presidenciale të Thaçit, më 25 shkurt 2016, Mustafa thirri një mbledhje të përbashkët të grupit parlamentar të LDK-së, presidencën qendrore dhe degët e LDK-së, në të cilën “të gjithë deputetët e LDK-së “pritej të veprojnë në përputhje me kërkesat politike të marrëveshjes të mbështetur nga strukturat e LDK-së”.

Megjithatë, një numër i deputetëve të LDK-së, duke përfshirë Adem Salihajn, Hatim Baxhaku, Shpejtim Bulliqin, Vjosa Osmani dhe të tjerë, mbetën sfidues, duke lënë sesionin plenar ose duke mos votuar në favor të Thaçit.

Mustafa Largon “Rebelët” nga Lista

Mustafa nuk ka dashur të presë për një kohë të gjatë për shpagim dhe ka përdorur zgjedhjet e parakohshme të qershorit për këtë qëllim.

Në një intervistë televizive të martën, Osmani konfirmoi se emri i saj ishte vendosur në listën e kandidatëve vetëm për shkak të presionit të madh nga anëtarët e LDK-së.

Në të vërtetë, në tubimin e parë të fushatës së LDK-së që u mbajt në Lipjan të martën, turma e aktivistëve të LDK-së brohorisnin emrin e Osmanit, pavarësisht pranisë së vetë Mustafës.

Megjithatë, jo të gjithë deputetët rebelë madje hynë në fund të listës zgjedhore, siç bëri Osmani.

Adem Salihaj, një veteran i LDK-së nga Ferizaj, qyteti i tretë më i madh në Kosovë, i cili ishte zëvendëskryeministër në vitin 2005, u përjashtua nga lista.

Ai për eliminimin e tij fajësoi kundërshtimin e tij të mëparshëm ndaj marrëveshjes së koalicionit PDK-LDK, si dhe marrëveshjes së diskutueshme të demarkacionit të kufirit me Malin e Zi.

Ai shtoi se një trajtim i tillë i zyrtarëve të LDK-së ishte “kundër parimeve elementare të demokracisë së brendshme partiake”.

Fatmir Rexhepi, një tjetër veteran i LDK-së nga Gjilani, qyteti më i madh në Kosovën lindore dhe ish-ministër i Brendshëm në vitin 2006-2007, tha se largimi i tij nga lista ishte gjithashtu një akt hakmarrjeje ndaj opinioneve të tij kritike.

Dy muaj më parë, kur Mustafa kishte në plan të riaktivizonte planet për të vazhduar me ratifikimin e marrëveshjes së diskutueshme të demarkacionit me Malin e Zi, Rexhepi tha se nuk do të votonte për marrëveshjen e kufirit.

Deklarata e tij nxori një kundër-deklaratë nga Mustafa, se ata që kundërshtonin marrëveshjen e demarkacionit “nuk kanë vend në LDK”. Rexhepi, i cili është veteran i partisë, u përgjigj: “Askush nuk mund të më nxjerrë nga LDK-ja”.

Shpejtim Bulliqi, deputet nga qyteti verior i Podujevës, një gjeograf dhe një kundërshtar i zëshëm i marrëveshjes së demarkacionit me Malin e Zi, nuk u propozua as nga dega e partisë, e kryesuar nga nënkryetari i parë i LDK-së, Agim Veliu.

Në rrjetet sociale, Bulliqi fajësoi Veliun dhe kryesinë e LDK-së për përjashtimin e tij nga lista, duke thënë se ai dhe zyrtarë të tjerë të LDK-së ishin përjashtuar për shkak të pozicioneve parimore që kishin marrë për çështje të rëndësishme politike. Ai gjithashtu akuzoi udhëheqjen e LDK-së për vazhdimin e “denigrimit dhe linçimit politik”.

Fetah Rudi, kreu i degës së LDK-së në Malishevë, një simbol i dhunës politike në Kosovë, i cili u plagos pas zgjedhjeve vendore të vitit 2000 dhe u paralizua si pasojë e plagëve, u hoq nga lista, edhe pse u propozua nga dega e tij.

Veprat e Hakmarrjes Mund t’i Kushtojnë Rëndë LDK-së

Mungesa e këtyre zyrtarëve të lartë dhe të njohur nga lista e kandidatëve të LDK-së ka gjasa të dëmtojë më tej imazhin tashmë të ndotur të LDK-së, pavarësisht se lidershipi është duke bërë përpjekje për të mbushur boshllëqet në listë me emra të rinj nga shoqëria civile dhe mediat.

Kjo mund t’i kushtojë në zgjedhjet e 11 qershorit, pasi shumë brenda dhe jashtë LDK-së e shohin largimin e këtyre zyrtarëve si të padrejtë.

“Heqja nga lista e disa zyrtarëve të shquar të LDK-së është një akt hakmarrjeje kundër deputetëve të pabindur për disa çështje, veçanërisht për demarkacionin [me Malin e Zi],” tha për BIRN, aktivistja e shoqërisë civile nga Prishtina, Besa Luzha.

“Kjo do t’i kushtojë LDK-së në zgjedhje, pavarësisht nëse ka rifreskuar listën e saj me emra të rinj. Duket hipokrizi, duke hapur derën për emra të rinj e duke shkarkuar zyrtarë të shquar pa asnjë procedurë demokratike “, shtoi ajo.

Statuti i LDK-së ndalon anëtarët e partisë që të jenë pjesë e trupave partiake, vendimet e të cilëve ata i kundërshtojnë. Megjithatë, ky rregull nuk zbatohet në listën zgjedhore.

Nga ana tjetër, përbërja e listës është plotësisht në duart e udhëheqjes së partisë. Presidenca qendrore, e kryesuar nga kryetari i partisë, heq propozimet për listën nga degët dhe e dërgon listën për miratim përfundimtar në Këshillin e Përgjithshëm të Partisë, i kryesuar gjithashtu nga kreu i partisë.

Mustafa më në fund u përgjigj të mërkurën në Facebook për akuzat në rritje të manipulimit të listës së kandidatëve.

“LDK-ja i vendosi ata në listë … LDK i hoqi ata nga lista … LDK i merr vendimet!” shfryi ai.

“LDK-ja është gjithmonë një hap përpara [të tjerëve]! Më demokratike, më e hapur, më e pakorruptuar dhe më e aftë për të qeverisur vendin. Pikë!” përfundoi ai.