Lutfi Haziri, kryetar i komunës së Gjilanit
Rrena për publikimin e listës së uzurpatorëve dhe kontratave me biznese
Deklarata
Lutfi Haziri: “Do të nxirret online lista prej 56 uzurpatorëve në tre muajt e parë të qeverisjes, sepse ne ende po punojmë me programin e legalizimit… Jemi njëra prej komunave të përzgjedhura për e-prokurim ku publikohen të gjitha kontratat, jo vetëm ofertat, por kontratat e lidhura me operatorët ekonomik.
Vlerësimi
Rrenë
Lutfi Haziri ende nuk e ka publikuar listën e uzurpatorëve edhe pse kanë kaluar 6 muaj prej që është rizgjedhur kryetar komune. Ai ka dhënë premtimin e ri, se pas dy muajsh do ta publikojë listën. Komuna e Gjilanit nuk është duke i publikuar kontratat që ata i lidhin me bizneset për ofrim të shërbimeve apo realizim të punëve.
Artikulli
Kryetari i Komunës së Gjilanit, Lutfi Haziri kishte deklaruar se në ueb-faqen e E-Prokurimit janë duke u publikuar të gjitha kontratat që Komuna e Gjilanit i lidh me operatorët ekonomik.
“Jemi njëra prej komunave të përzgjedhura për e-prokurim ku publikohen të gjitha kontratat, jo vetëm ofertat, por kontratat e lidhura me operatorët ekonomik”, ka thënë Haziri.
Por, një gjë e tillë nuk është duke ndodhur për komunën e Gjilanit, por as për autoritetet tjera.
Deri më tani, ministria e Zhvillimit Ekonomik i ka publikuar kontratat e nënshkruara për projektin e Kosovës së Re, mirëpo komunat ende nuk i publikojnë as kontratat më të vogla për furnizime, kryerje të shërbimeve apo punëve. Pyetja, nëse do të publikohen kontratat që komunat i lidhin me OE i është dërguar kandidatëve për kryetar të komunave 48 orë para debatit për balotazh.
Kryetari i Komunës së Gjilanit, Lutfi Haziri nuk e ka mbajtur premtimin sa i përket publikimit të uzurpatorëve të Komunës.
Në debatin e balotazhit në emisionin Jeta në Kosovë, Kryetari Lutfi Haziri kishte deklaruar se brenda 3 muajve të parë të qeverisjes do të nxjerrë listën prej 56 uzurpatorëve.
“Do të nxjerrët online lista prej 56 uzurpatorëve në tre muajt e parë të qeverisjes, sepse ne ende po punojmë me programin e legelazimit”, kishte thënë Haziri në debatin e balotazhit në emisionin Jeta në Kosovë.
Kjo listë e uzurpatorëve nuk është publikuar online dhe krypometri e cilëson këtë si rrenë të kryptë.
Haziri kishte bërë betimin si kryetar komune më 22 dhjetor, një muaj pasi doli fitues i zgjedhjeve lokale.
Prej 22 dhjetorit e deri sot janë bërë gati 6 muaj, dyfishi i kohës që e kishte premtuar Haziri për publikimin e listës së uzurpatorëve.
KALLXO.com ka kontaktuar me zyrën për informim të Komunës së Gjilanit dhe ata duke e cituar kryetarin, Lutfi Haziri kanë bërë të ditur se lista e uzurpatorëve do të prezantohet pas dy muajsh.
“Jemi në fazën finale të vlerësimit dhe pas dy muajsh do ta publikojmë listën e uzurpatorëve”, ka thënë Haziri për KALLXO.com përmes zyrës për informim.
