FOTO ARKIV
Kalimi në të Kuqen, Policia me Plan Konkret
Njësiti Rajonal i Komunikacionit Rrugor në Prishtinë ka njoftuar se nga sot ka hyrë në zbatim plani i ri për mosrespektimin e dritës së kuqe të semaforit.
Në bazë të planit, policët me rroba civile do të jenë të vendosur afër udhëkryqeve me semaforë për të fotografuar shoferët që hyjnë në të kuqen.
“Fotografia e cila bëhet nga policët civil përdoret si dëshmi nga komisioni , në rast se pala bënë ankesë brenda afatit prej 15 ditëve”, thuhet në përgjigjen e Policisë dhënë për KALLXO.com
Policia ka bërë të ditur se gjobat për kundërvajtësit do të bëhen siç janë paraparë në kuadër të ligjit të ri për kundërvajtje.
‘’Shoferët të cilët nuk i respektojnë rregullat për respektimin e dritës së kuqe të semaforit do të gjobiten me 150 euro, tri pikë negative si dhe tre muaj konfiskim i patentë shoferit, siç është paraparë në Ligjin e ri për kundërvajtje’’, thuhet në përgjigjen e Policisë .
NJRKRR ka njoftuar se policët civil do të mbulojnë shumicën e udhëkryqeve në Prishtinë.
Sipas Policisë ky plan ka hyrë në zbatim për shkak se është vërejtur një numër i konsiderueshëm i shoferëve të cilët nuk respektojnë dritën e kuqe.