Shtyhet gjykimi i imamëve dhe Fuad Ramiqit

Një anëtar i trupit gjykues mungoi në gjykimin e katër imamëve dhe Fuad Ramiqit, duke shkaktuar dështimin e seancës.

Në gjykimin e Fuad Ramiqit dhe katër imamëve Bedri Robajt, Idriz Bilibanit, Enes Gogës dhe Mazllam Mazllamit, të cilët po akuzohen për vepra që lidhen me terrorizëm dhe thirrje për rezistencë mungoi gjyqtari Isuf Makolli.

Pasi trupi gjykues nuk ishte komplet, seanca është shtyrë më 14 maj.

Në seancën që dështoi të mbahej, ishte paraparë paraqitja e mbrojtjes së Fuad Ramiqit dhe imamit Mazllam Mazllami.

Gjatë seancës së kaluar mbrojtjen e kanë dhënë imamët Idriz Bilibani dhe Enes Goga, të cilët gjatë dëshmisë së tyre ndër të tjera kanë deklaruar se ISIS kishte kërkuar vrasjen e tyre, pasi që emrat e tyre janë publikuar në një gazetë zyrtare të ISIS –it, në bazë të së cilës ISIS ka kërkuar vrasjen e disa imamëve të Ballkanit.

Kurse imami Bedri Robaj vendosi që të mbrohej në heshtje.

http://kallxo.com/imamet-kosovare-te-akuzuar-per-terrorizem-thone-se-isis-ka-kerkuar-vrasjen-e-tyre/

Sipas aktakuzës, Bedri Robaj që nga viti 2012 e deri në gusht të vitit 2014 në Prishtinë, në xhaminë e improvizuar te “Termokosi”, ku ka shërbyer si imam, gjatë predikimeve dhe ligjëratave private ka mbështetur xhihadin-shehidllëkun në Siri.

“Xhamia” te “Termokosi” ka vepruar jashtë juridiksionit të Bashkësisë Islame të Kosovës.

Ndërsa, Idriz Bilibani akuzohet se që nga viti 2012 e deri në kohën e arrestimit, në Prizren dhe në vende të tjera në Kosovë, si hoxhë gjatë mbajtjes së ligjëratave fetare në xhami – OJQ-në  “El Bejan” dhe paraqitjet e tjera publike të incizuara në video, ka përcjellë mesazhe shtytëse që persona të pacaktuar t’i bashkohen organizatës terroriste “Al Nusra” në Siri.

Kurse, Enes Goga, në pozitën e hoxhës në Pejë, në një ligjëratë fetare para besimtarëve në Pejë, përmes “Audionur” me datën 10 mars 2014 të publikuar në YouTube, në të cilën kanë qasje një numër i pacaktuar i personave, publikisht ka nxitur urrejtje ndaj grupeve fetare të besimtarëve të krishterë.

Fuad Ramiqi akuzohet se prej fillimit të muajit shtator në paraqitjet e tij publike në mjetet e informimit, në televizione, gazeta dhe rrjete sociale, ka bërë thirrje për rezistencë ndaj organeve të drejtësisë.

Sipas Prokurorisë, me anë të këtyre veprimeve të akuzuarit Bedri Robaj dhe Idriz Bilibani kanë kryer veprën penale shtytje për kryerjen e veprave terroriste, kurse të akuzuarit tjerë Enes Goga e Mazllam Mazllami akuzohen se kanë kryer veprën penale nxitja e urrejtjes, përçarjes ose mosdurimit kombëtar, racor, fetar apo etnik.

http://kallxo.com/fuad-ramiqi-dhe-4-imame-deklarohen-te-pafajshem/

http://kallxo.com/kryeimami-bashkesise-islame-deshmitar-ne-gjykimin-e-imameve/