O’Connell: Vendimi për Transformimin e FSK-së në Bashkëpunim me NATO

Ministri i Forcës dhe Sigurisë së Kosovës, Rrustem Berisha, priti në takim për herë të parë ambasadorin e Mbretërisë së Bashkuar, Ruairi O’Connell.

Në një komunikatë për media bëhet e ditur se në takimin e përbashkët të ministrit Berisha dhe ambasadorit O’Connell u bisedua lidhur me marrëdhëniet e shkëlqyera dhe bashkëpunimin e frytshëm ndërmjet Ministrisë për FSK dhe Ministrisë britanike të Mbrojtjes si dhe FSK-së dhe
Forcave të Armatosura të Mbretërisë së Bashkuar, duke u zotuar për vazhdimin, avancimin dhe intensifikimin e këtyre marrëdhënieve në të ardhmen.

Berisha pasi e falënderoi ambasadorin për përkrahjen ai foli edhe për gjendjen e tanishme në Ministri dhe Forcë, planet për transformimin e Forcës së Sigurisë së Kosovës në Forcë të Armatosur, duke u shprehur se procesi i transformimit të FSK-së në FAK do të jetë plotësisht transparent dhe në koordinim të plotë me NATO-n dhe partnerët strategjikë, si Shtetet e Bashkuara të Amerikës, Mbretërinë e Bashkuar etj.

Nga ana e tij, ambasadori O’Connell duke uruar ministrin Berisha për detyrën e re, u shpreh se marrëdhëniet e mira ndërmjet Mbretërisë së Bashkuar dhe Republikës së Kosovës do të vazhdojnë edhe në të ardhmen, e gjithashtu edhe marrëdhëniet e shkëlqyera ndërmjet ministrive dhe dy Forcave tona.

Ambasadori O’Connell për çështjen e transformimin të FSK-së tha se vendimin për transformimin e FSK-së në FAK, Kosova duhet ta marrë në bashkëpunim me NATO-n, duke u shprehur se siguria e Kosovës varet nga marrëdhëniet me NATO-n.

Në takimin e përbashkët të të dyja delegacioneve ishte i pranishëm edhe atasheu ushtarak i Mbretërisë së Bashkuar në Republikën e Maqedonisë i akredituar edhe për Kosovë, nënkolonel Richard Perry./21Media