Foto: Ilustrim
Ministria e Mbrojtjes tregon se si FSK e gjeti trupin e viktimës në bjeshkët e Rugovës
Ministria e Mbrojtjes e Kosovës ka bërë të ditur se pjesëtarët e FSK-së e kanë gjetur sot pasdite trupin e pajetë të qytetarit M.N., i cili ishte zhdukur pas sulmit nga të afërm të tij.
Sipas Ministrisë së Mbrojtjes, me vendim të ministrit Rrustem Berisha dhe me urdhër të komandantit të FSK-së, gjenerallejtënant Rrahman Rama, një ekip i kërkim-shpëtimit të FSK-së është angazhuar në operacion kërkimi të një personi të zhdukur në bjeshkët e Rugovës.
“Ekipi profesionist i FSK-së prej 12 pjesëtarëve pas një operacioni të gjerë kërkimi, në një terren të vështirë ka arritur të gjej trupin e pajetë të personit të shpallur në kërkim nga Policia e Kosovës, me inicialet M.N. i moshës 50 vjeçare nga fshati Shtupeq i Madh i Pejës”, ka njoftuar Ministria e Mbrojtjes.
Sipas Ministrisë, ekipi i FSK-së trupin pajetë ia ka dorëzuar Policisë dhe familjarëve të të ndjerit për procedura të mëtutjeshme.
KALLXO.com raportoi për gjetjen e trupit të viktimës, i cili konsiderohej i zhdukur që nga e premtja në mbrëmje, kur dyshohet se u sulmua nga familjarë të tij, të cilët sipas Policisë, përdorën edhe sëpata.
https://kallxo.com/foto-terhiqet-trupi-i-pajete-i-personit-qe-u-sulmua-me-sepate-nga-te-afermit/
Trupi i viktimës u tërhoq nga Mjekësia Ligjore rreth 4 orë pas gjetjes së tij.
Lidhur me rastin, tre persona të dyshuar janë arrestuar, njëri prej tyre i mitur.
Prokuroria e Pejës ka kërkuar masën e paraburgimit për të dyshuarit.