Ministri i Drejtësisë refuzon raportimin para deputetëve, sërish akuza ndaj Vetëvendosjes
Ministri i Drejtësisë, Abelard Tahiri ka vazhduar të polemizojë me partinë Lëvizja Vetëvendosje, përkatësisht deputetët e kësaj partie.
Deputetja e Lëvizjes Vetëvendosje, Albulena Haxhiu sot tregoi se Ministri i Drejtësisë Abelard Tahiri ka refuzuar raportimin e tij në Komisionin për Legjislacion që ishte paraparë për nesër
Përmes llogarisë në Facebook, Haxhiu ka thënë se refuzimin e pjesëmarrjes së tij në këtë komision, ministri Tahiri e ka sqaruar përmes një letre.
“Sapo pranova një letër nga Ministri i Drejtësisë Abelard Tahiri, me anë të së cilës më ka njoftuar mbi refuzimin e tij të sërishëm, për të raportuar nesër në Komisionin për Legjislacion. Mbi pretendimet e tij skandaloze që i shpreh në letër, do njoftoheni nesër në orën 13:00 në mbledhjen e Komisionit.”, ka shkruar Haxhiu.
Në anën tjetër, Ministri i Drejtësisë, Abelard Tahiri ka thënë për KALLXO.com se në letrën që i ka dërguar këtij komisoni, ai ka sqaruar se nuk mendon se duhet të diskutohet në Komisionin për Legjislacion, çështja e Administratës së Gjyqësorit dhe e Shërbimit Korrektues.
Sipas tij, qeveria i ka mbështetur këto institucione në aspektin e ngritjes së pagave edhe në aspektin e kapaciteteve.
“Politizimi i proceseve të tilla është i papranueshëm. Në fund të fundit janë këta deputetët e Kosovës të cilët e kanë pru Ligjin për Paga, që i ka përcaktu kategoritë çfare i kemi sot. Nuk mund të bëjmë politikë mbi Shërbimin Korrektuese dhe Administratën e Gjyqësorit, e t’i politizojmë këto dy institucione mjaft të rëndësishme, për interesat e një partie apo një deputeti të caktuar. Pikërisht për një gjë të tillë, unë po refuzoj kategorikisht që të vihet në diskutime politike çështja e administratës së gjyqësorit edhe çështja e shërbimit korrektues të Kosovës”, ka thënë ministri.
Në anën tjetër, Gazeta Jeta në Kosovë ka publikuar hulumtimin mbi dyshimet për keqpërdorime në këtë konkurs.
Dyshime të forta për keqpërdorime në testin e noterisë
