Ilustrim: Jeta Dobranja/Trembelat
Kundërshtohet rritja e kufizimit të vjetërsisë së veturave që mund të importohen
Komisioni parlamentar për Zhvillim Ekonomik dje ka miratuar Projektligjin për ndryshimin e Ligjit për Automjetet, në të cilin hyn edhe amendamenti që kufiri i vjetërsisë së automjeteve që mund të importohen të rritet nga 10 në 15 vjet.
Megjithëse përkrahje për këtë ndryshim kanë dhënë deputetët e partive në pushtet, opozita dhe shoqëria civile po shprehen kundër këtij vendimi, që sipas tyre ndikon në ndotjen e ajrit dhe rritjen e numrit të aksidenteve në komunikacion për shkak të vjetërsisë së veturave.
Anëtarja e Komisionit për Zhvillim Ekonomik nga radhët e LDK-së, Hykmete Bajrami, ka deklaruar për KALLXO.com se ky subjekt politik nuk do ta përkrahë Projektligjin as në seancë plenare të Kuvendit.
“Unë edhe dje kam votuar kundër në Komision dhe si LDK nuk do ta përkrahim këtë Ligj në lexim të dytë. Arsyeja është se ne mendojmë që nuk është absolutisht e nevojshme që të zgjatet vjetërsia e veturave nga 10 vjet në 15 vite, sa ka propozuar grupi punues dhe Komisioni dje. Kjo ndikon në radhë të parë në ndotjen e ambientit, ndikon gjithashtu në rritjen e probabilitetit për aksidente, domethënë drejtpërdrejt është e lidhur me sigurinë e pasagjerëve të veturave”, tha Bajrami për KALLXO.com.
Sipas Bajramit, të njëjtin konfirmim e ka marrë edhe nga deputetët e Lëvizjes Vetëvendosje dhe të Partisë Socialdemokrate.
Ndërsa, Dardan Sejdiu nga PSD-ja, dje në mbledhjen e Komisionit ka deklaruar se qëndrimin kundër ndryshimit të Ligjit për Automjete do ta mbajë edhe në seancë plenare.
“Unë kam parë statistika që vjetërsia e veturave ndikon në aksidente me fatalitet dhe këto statistika tregojnë që sa më e vjetër vetura, numri aksidenteve me fatalitet rritet. Kështu që unë jam kategorikisht kundër. Këtë qëndrim do ta mbaj edhe në seancë plenare. I lus deputetët që të reflektojnë në këtë drejtim jo në ambient, por në çështje sigurie”, u shpreh Sejdiu.
Edhe Liburn Aliu nga Lëvizja Vetëvendosje, i cili është anëtar i Komisionit për Zhvillim Ekonomik, tha se është kundër ndryshimit të Ligjit.
Në anën tjetër, Ellen Frank Lajqi nga organizata joqeveritare “ERA” ka deklaruar për KALLXO.com se derisa po diskutohet vjetërsia e veturave të importuara, ndotja e ajrit është një shqetësim i madh për shëndetin mjedisor në Kosovë.
“Unë jam më shumë e shqetësuar se duke e përqendruar diskutimin nëse duhet të lejohet të importohen makina më të vjetra se 10 apo 15 vjet, ne po e drejtojmë bisedën larg nga adresimi i faktit se ka shqetësime të mëdha në lidhje me sasinë e emetimeve nga makinat që janë aktualisht në Kosovë”, u shpreh Frank-Lajqi.
Me gjithë kundërshtimet, Muharrem Nitaj, kryetar i Grupit Punues për plotësim ndryshimin e Ligjit për Automjete, është shprehur optimist se Ligji do të kalojë në Kuvend.
“Jam i bindur se këto amendamente do ta marrin mbështetjen edhe në seancë plenare. Si kryetar i Grupit Punues për plotësim ndryshimin e Ligjit për Automjete, e falënderoj deputetin Mërgim Lushtaku si dhe gjithë anëtarët e Grupit për punën e bërë! Votimi i sotëm korrigjon disa padrejtësi që u janë bërë qytetarëve!”, shkroi ndër të tjera Nitaj në Facebook pas mbledhjes së Komisionit.
https://kallxo.com/veturat-ndotin-sa-cereku-termocentraleve/
KALLXO.com ka raportuar në vazhdimësi lidhur me iniciativën për heqjen e kufizimit për importin e veturave të vjetra.
https://kallxo.com/nga-1-janari-ndalohet-importi-i-automjeteve-me-te-vjetra-se-10-vjet/
Kallxo.com
