Filloi ndërtimi i trotuarit në një fshat të Malishevës

Kanë filluar punimet në ndërtimin e trotuarit në fshatin Llazicë të Komunës së Malishevës.

Kështu ka njoftuar Komuna e Malishevës ku thuhet se ky trotuar, ndërtohet me qëllim të krijimit të sigurisë për fëmijët e fshatit, të cilët duhet të udhëtojnë përgjatë rrugës, deri në shkollë.

Në fillimin e punimeve në këtë trotuar, ishin të pranishëm Kryetari i Komunës së Malishevës, Ragip Begaj dhe drejtori komunal i urbanizmit, Islam Vrenezi.

“Ky trotuar është në shërbim të qytetarëve dhe në veçanti të nxënësve, të cilët udhëtojnë përgjatë kësaj rruge, nga lagjet e tyre, e deri në shkollë, dhe në vazhdimësi janë të rrezikuar  gjatë udhëtimit të tyre. Me qëllim të krijimit të kushteve të sigurisë në rrugë, ne kemi filluar me rregullimin e këtij trotuari, në mënyrë që fëmijëve të ju krijojmë siguri gjatë rrugës për në shkollës”, tha kryetari Begaj.

Drejtori i urbanizmit, Islam Vrenezi, ka sqaruar se ky trotuar, është i gjatë një kilometër, i cili lidhet nga rruga e lagjes së Foniqëve në Llazicë, dhe vazhdon përgjatë rrugës kryesore, deri në shkollë. Ndërtimi i trotuarit mundësohet nga buxheti komunal i Malishevës.