Disa nga deputetët opozitarë nuk kanë hyrë në Kuvend, ngase nuk duan të kontrollohen detajisht.

Deputetja e “Vetëvendosjes” Shqipe Pantina e pranoi për KALLXO.com se disa nga deputetët opozitarë janë jashtë, e disa kanë hyrë në Kuvend.

“Po, kemi hy, disa janë jashtë se s’po pranojnë me duar me i prekë,” tha Pantina.

Në sallën e mbledhjeve të Kuvendit sipas gazetarëve të KALLXO.com aktualisht nga opozitarët ndodhet vetëm Rexhep Selimi, deputet i “Vetëvendosjes”.

Lëvizja “Vetëvendosje” para nisjes së seancës së Kuvendit ku pritet mes tjerash të miratohet buxheti i vitit të ardhshëm, me anë të një njoftimi, ditët kur ka seanca në Kuvend i cilësoi ditë policore.

Subjekti më i madh opozitar njoftoi se në mëngjesin e sotëm është arrestuar në shtëpinë e tij për t’u dërguar në gjykatë deputeti Ismajl Kurteshi.

Kurteshi shkeli të shtunën urdhrin e gjykatës për të qëndruar në arrest shtëpiak, pasi doli dhe mbajti fjalim në manifestimin opozitar në Gjilan.

“Vetëvendosja” në njoftim bën të ditur se policë civilë po mbikëqyrin zyrat e grupeve parlamentare të opozitës, ndërsa nuk po lejojnë hyrjen e deputetëve opozitarë në Kuvend, pa i kontrolluar detajisht.

“Një qeveri që me polici përpiqet të shtypë opozitën, është qeveri jolegjitime,” thuhet në njoftimin e “Vetëvendosjes”.