SHBA: Operacioni 21-orësh, transplanti i parë në botë i syrit  

Kirurgët në Nju Jork thonë se kanë kryer transplantin e parë të plotë të syrit në botë te një burrë, megjithëse nuk është e sigurt se atij do t’i rikthehet shikimi.

Aaron James, i cili i mbijetoi një aksidenti elektrik të tensionit të lartë, iu nënshtrua një operacioni 21 orësh duke e zëvendësuar gjysmën e fytyrës së tij.

Kirurgët kanë qenë në gjendje ta transplantojnë kornean me sukses prej vitesh.

Ekspertët e kanë quajtur këtë progres një moment kyç në përpjekjen për t’i rikthyer shikimin miliona njerëzve.

James, një punonjës i linjës së tensionit të lartë nga Arkansas, humbi pjesën më të madhe të fytyrës kur preku aksidentalisht një tel të rrymës 7,200 volt në vitin 2021.

Më 27 maj të këtij viti, ai iu nënshtrua një transplanti të rrallë të pjesshëm të fytyrës, përveç transplantit të syrit – ku përfshiheshin më shumë se 140 profesionistë të kujdesit shëndetësor.

Kirurgët në NYU Langone Health, të cilët kryen operacionin e ndërlikuar, thanë të enjten se James, 46 vjeç, po shërohet mirë nga transplanti i dyfishtë dhe syri i dhuruar duket jashtëzakonisht i shëndetshëm. Syri i tij i djathtë ende punon.

“Fakti i thjeshtë që ne e kemi realizuar transplantin e parë të suksesshëm të syrit të plotë me një fytyrë është një arritje e jashtëzakonshme që shumë prej tyre e kanë menduar prej kohësh se nuk ishte e mundur”, thotë Dr Eduardo Rodriguez, një nga kirurgët kryesorë në ekip. “Ne kemi bërë një hap të madh përpara dhe kemi hapur rrugën për kapitullin tjetër për të rivendosur vizionin.”

Mjekët thonë se operacioni i James u ofron shkencëtarëve një mundësi të paprecedentë se si syri i njeriut përpiqet të shërohet.

Mjekët thanë se kishte rrjedhje të drejtpërdrejtë të gjakut në retinë – pjesa e syrit që dërgon imazhe në tru. Ndërkohë që nuk ka siguri që James do ta rikthejë shikimin në syrin e tij të ri, mjekët nuk e përjashtojnë as këtë mundësi.

James, një veteran ushtarak, do të vazhdojë të monitorohet nga mjekët, mirëpo progresi që ata kanë parë me sy është “i jashtëzakonshëm”, thotë Bruce E. Gelb, MD, kirurg transplanti në Universitetin e Nju Jorkut.

Fytyra dhe syri i dhuruar erdhën nga një dhurues i vetëm mashkull në të 30-at. Gjatë operacionit, mjekët i injektuan qeliza staminale të rritura nga palca e eshtrave të dhuruesit në nervin optik për ta inkurajuar riparimin e tij.

James është vetëm personi i 19-të në SHBA që i nënshtrohet transplantit të fytyrës.

Pas aksidentit, James iu desh ta hiqte syrin e majtë për shkak të dhimbjes dhe i është nënshtruar një sërë operacioneve, duke përfshirë një për krahun protetik.

Ai e ka quajtur transplantin e syrit si “ndryshues i jetës” dhe thotë se është “mirënjohës pa fjalë” për donatorin dhe familjen e tyre që e kanë bërë të mundur operacionin.

“Dukem si një person normal që ecën në rrugë”, ka thënë James për NBC News./BBC