
FOTO - Aksioni i Policisë në veri - 28.05.2019
Mjetet e blinduara të Policisë afër veriut të Mitrovicës - VIDEO
Automjetet e blinduara të Policisë së Kosovës janë duke pritur në gjendje gatishmërie në afërsi të pjesës veriore të Mitrovicës.
Një aksion i gjerë i Policisë është duke u zhvilluar, siç mëson KALLXO.com kundër kontrabandës.
KALLXO.com raportoi se një pjesëtar i Policisë është plagosur lehtë me armë zjarri gjatë këtij aksioni – ku deri më tani janë arrestuar pesë persona të dyshuar, njëri prej tyre komandant i Policisë në Zubin Potok.
KALLXO.com ju sjell pamje ekskluzive nga ky aksion i gjerë i Policisë së Kosovës në veri të vendit, aksion i cili ka nisur në orët e para të mëngjesit të sotëm.
Që nga fillimi i këtij aksioni, në pjesën veriore janë aktivizuar alarmet, të cilët njëjtë aktivizohen sa herë që organet e rendit ndërmarrin aksione në përmbushjen e obligimeve ligjore.
Prokurori i rastit Sylë Hoxha ka thënë për KALLXO.com se deri më tani janë arrestuar pesë persona të dyshuar nga Policia. Në mesin e të arrestuarve është edhe komandanti i Policisë në Zubin Potok.
Hoxha nuk ka dhënë më shume detaje lidhur me aksionin e sotëm, pasi sipas tij aksion është ende në zhvillim e sipër.
KALLXO.com raportoi që nga orët e para të mëngjesit për aksionin ne ndërmarrë nga ana e Policisë në veri të vendit.
KALLXO.com nga vendi i ngjarjes ka siguruar pamje ku shihen njësi të shumta të Policisë së Kosovës.
KALLXO.com është në vendin e ngjarjes dhe do ju mbaj të informuar rreth këtij aksioni të gjerë kundër kontrabandës.