Mbyllen 6 motele në Ferizaj

Komuna e Ferizajt ka njoftuar se pas një aksioni të Policisë së Kosovës janë inspektuar 35 motele.

Sipas njoftimit për 15 prej tyre do të iniciohet shumë shpejt procedura pranë gjykatës, kurse 6 prej tyre janë mbyllur menjëherë për shkakun e mosplotësimit të kushteve minimalo-teknike dhe mungesave së kushteve sanitare.

Aksioni që u zhvillua pak ditë më parë ishte iniciuar nga Ministria e Tregtisë dhe Industrisë, në zbatim nga Policia e Kosovës – Njësia e Krimeve Ekonomike, Njësia Kundër Trafikut me Qenie Njerëzore, Administrata Tatimore e Kosovës dhe Inspektorati i Komunës në kontroll të lokaleve hoteliere – moteleve që afarojnë në brendi të qytetit të Ferizajt dhe jashtë tij.

Ridvan Berisha, koordinator i Inspektoratit të Komunës tha se ky aksion kaq i gjerë që është shtrirë mbi qytetin tonë dhe rrethinën ka një qëllim, atë të shmangies së dukurive eventuale devijante në këto biznese dhe kontrollit sanitar që parashihet me normativin ligjor në fuqi.

Ai tutje, tha se do të vazhdohet edhe ditëve në vijim me këtë aksion dhe se vazhdimisht inspektorët e tregut dhe sanitar janë në vëzhgim e kontroll të afër të këtyre llojeve të bizneseve.