Vazhdon identifikimi i kufomave në Tetovë

Koordinatori i spitalit modular të COVID-19   në Tetovë, Gëzim Nuredini, deklaroi sot se identifikimi i disa viktimave po shkon me vështirësi dhe se për to duhet të bëhet analiza e ADN-së.

Ai apeloi tek familjarët për durim, dhe njoftoi se kufomat do tua dërgojnë deri në shtëpi.

“Kanë vështirësi me identifikimin e trupave dhe ata na u lajmëruan neve se duhet t’i thërrasim familjarët që të bëhet analiza e AND-së që më lehtë të bëhet identifikimi i disave prej tyre. Besoj se brenda ditës së sotme, të kenë durim familjarët, do të kenë të gjithë informata dhe edhe kufomat me ndihmën e komunës do tua dërgojmë në shtëpi”, tha Nuredini.

Më shumë se 10 persona kanë humbur jetën nga zjarri që ka shpërthyer të mërkurën në spitalin e përkohshëm në Tetovë të Maqedonisë së Veriut, ku po trajtoheshin të infektuarit me coronavirus./TV21