Sindikata e Shërbyeseve Civil mirëpret vendimin e Kushtetueses për anëtarët e KPMShCK-së, apelojnë për llogaridhënie

Sindikata e Shërbimit Civil të Kosova ka përshëndetur vendimin e Kushtetueses i cili konstatoi se vendimi për shkarkimin e 5 anëtarëve të Këshillit të Pavarur Mbikëqyrës për Shërbimin Civil të Kosovës, është në kundërshtim me dispozitat e Kushtetutës.

Sindikata përmes një njoftimi potencon se në këtë formë është mbrojtur interesi i shtetit të Kosovës dhe i Shërbyeseve civil në veçanti, ngase, sipas tyre, nuk do të duhej në asnjë formë Kuvendi i Kosovës të merret me këtë institucion të pavarur.

Sindikata tutje në njoftim thekson se kjo praktikë e sulmeve dhe etiketimeve pa asnjë justifikim ligjor mbi këto institucione është një pasqyrë jo e mirë edhe në raport me bashkësinë ndërkombëtare dhe dëmton në masë të madhe imazhin e Shtetit të Kosovës.

Sipas tyre, Kuvendi i Kosovës dhe komisionet parlamentare nuk duhet të luajë rolin e Policisë, Prokurorisë dhe Gjykatës sepse përgjegjësit janë të ndara në këtë aspekt, andaj edhe nuk duhet të ndërhyhet në kompetenca të institucioneve tjera.

Tutje, ata kërkojnë që të mos kalohet pa llogaridhënie për ata që kanë shkelë kushtetutën e vendit tonë.

Më poshtë gjeni reagimin e plotë të Sindikatës së Shërbimit Civil:

“Sindikata e Shërbimit Civil të Kosovës (SSHCK), përshëndet vendimin e Gjykatës Kushtetuese të Republikës së Kosovës i cili  konstatoi se; vendimi për shkarkimin e 5 anëtarëve të KPMSHCK-së është kundër kushtetues. Në këtë formë është mbrojtur, në mënyrën më të mirë, interesi i Shtetit të Kosovës dhe Shërbyesve Civil në veçanti ngase, nuk do të duhej në asnjë formë Kuvendi i Kosovës të merret me këtë institucion të pavarur e që ne edhe më herët kemi thënë se është një lloj Gjykate e Shërbimit Civil dhe këtë e ka konfirmuar edhe Gjykata Kushtetuese duke e emërtuar si një lloj ”tribunali” që nënkupton se kuvendi dhe politika duhet të mbajnë larg duart nga institucionet e pavarura kushtetuese.

Kjo praktikë e sulmeve dhe etiketimeve pa asnjë justifikim ligjor mbi këto institucione është një pasqyrë jo e mirë edhe në raport me bashkësinë ndërkombëtare dhe dëmton në masë të madhe imazhin e Shtetit të Kosovës, sepse në këtë formë krijon një precedentë të rrezikshëm që çdo qeveri dhe pushtet të merret me këto institucione në vazhdimësi, varësisht se cila parti është në pushtet.

Tendenca për të sulmuar këto institucione të pavarura është në kundërshtim me çdo normë dhe rregull dhe se Kuvendi i Kosovës dhe komisionet parlamentare nuk duhet të luajë rolin e Policisë, Prokurorisë dhe Gjykatës sepse përgjegjësit janë të ndara në këtë aspekt, andaj edhe nuk duhet të ndërhyhet në kompetenca të institucioneve tjera.

Sindikata e Shërbimit Civil të Kosovës kërkon nga kreu i Kuvendit të Kosovës dhe kryesia, që të merr masa ndaj atyre që kanë qenë promotor të këtyre proceseve me ç ‘rast i është shkaktuar dëm i pariparueshëm institucionit më të lartë të vendit tonë Kuvendit të Kosovës, sepse çfarë mund të pritet nga institucionet tjera kur Kuvendi shkel Kushtetutën e Kosovës si dokumenti më i rëndësishëm i vendit.

Apelojmë që të mos kalohet pa llogaridhënie ata që kanë shkelë kushtetutën e vendit tonë.”

Kushtetuesja shfuqizon vendimin e Kuvendit për shkarkimin e 5 anëtarëve të KPMShCK-së