Shtetet e Bashkuara dënojnë zgjedhjet në Bjellorusi

Shtetet e Bashkuara të Amerikës kanë dënuar zgjedhjet parlamentare dhe vendore që u mbajtën të dielën (25.02.2024) në Bjellorusi, tha Departamenti amerikan i Shtetit.

“Zgjedhjet u mbajtën nën frikë dhe asnjë proces zgjedhor që zhvillohet në një klimë të tillë nuk mund të cilësohet demokratik”, tha zëdhënësi i Departamentit Mathew Miller përmes një deklarate.

Procesi i sotëm që po kontrollohet rreptësisht pritet të forcojë pushtetin e udhëheqësit autoritar Alexander Lukashenko, pavarësisht thirrjeve të opozitës për bojkot.

Presidenti Lukashenko e ka drejtuar Bjellorusinë me dorë të hekurt prej thuajse tre dekadash. Ai njoftoi të dielën se do të garojë sërish në zgjedhjet që do të mbahen vitin e ardhshëm për postin e presidentit.

Ai e akuzon Perëndimin se po përpiqet të përdorë zgjedhjet për të minuar qeverinë e tij dhe për të krijuar paqëndrueshmëri në shtetin me 9.5 milionë banorë.

Shumica e kandidatëve i përkasin 4 partive të regjistruara në zgjedhje, që mbështesin politikat e zotit Lukasheko. Vitin e kaluar rreth 12 parti të tjera refuzuan të regjistroheshin për të marrë pjesë në zgjedhje.

Këto janë zgjedhjet e para pas votimeve të debatueshme të vitit 2020, që i dhanë Lukashenkos mandatin e gjashtë, duke nxitur protesta të mëdha në atë vend./VOA