Shpërthim i fuqishëm në Tiranë, cak vetura e një prokurori
Një shpërthim me tritol ka ndodhur mbrëmjen e sotme në zonën e Komunës së Parisit në Tiranë.
Mësohet se shënjestra ishte Arjan Muça, inspektor në Këshillin e Lartë të Prokurorisë.
Atij i ka shpërthyer bomba në makinë, ndërsa nuk është raportuar për të plagosur.
Muça ka qenë më parë oficer tek ish prokuroria e krimeve të rënda dhe ish prokuror në Gjirokastër. Gruaja, Gentiana Muça është gjyqtare në Apelin Administrativ.
Drejtori i Policisë së Tiranës, Rebani Jaupaj ka folur për mediat në lidhje me ngjarjen duke thënë se mjeti ka dëmtime në pjesën e përparme.
“Përdoret nga prokurori dhe aktualisht prej një periudhe dy vjeçare parkohet pranë kësaj qendre. Janë marrë masa nga policia për dokumentimin e kësaj vepre penale. Nuk ka të lënduar dhe dëmtime të mjeteve të tjera. Shpërthimi ka ndodhur në pjesën e parakolpit të makinës. Nuk ka pasur asnjë person afër dhe grupi hetimor po merret me pamjet dhe veprimet hetimore”, tha ai.
Gjithashtu edhe Policia e Shtetit ka lëshuar një komunikatë për media.
“Me datë 11.03.2021, rreth orës 19:30, tek Komuna e Parisit, në rrethana ende të paqarta ka shpërthyer dyshohet si pasojë e lëndës plasëse mjeti i parkuar në pronësi të shtetasit A. M., ku ka vetëm dëme materiale.Grupi hetimor ndodhet ne vendngjarje dhe po punon për zbardhjen e plotë të rrethanave të ngjarjes. Shërbimet e Policisë po kontrollojnë zonën si dhe janë ngritur pika kontrolli me qëllim kapjen e autorit“, thuhet në njoftimin e policisë./TopChannel.