Serbia sjell barna për serbët e Kosovës, dërgesa pret lejen e MSH-së

Partia më e madhe serbe në Kosovë, Lista Serbe ishte ankuar gjatë javës së kaluar se serbët kanë mbetur pa barna në institucionet paralele shëndetësore të tyre.

Ndonëse Ministria e Shëndetësisë në Kosovë ishte duke e trajtuar këtë çështje, Serbia ka dërguar në kufi kamionë me barna.

Kështu ka bërë të ditur drejtori i të ashtuquajturës zyrë për Kosovën në Qeverinë e Serbisë.

“Falë luftës intensive dhe të gjatë diplomatike, kontingjenti i barnave tona do të dërgohet së shpejti në spitalet e serbëve në Kosovë. Dy kamionë tërheqës dhe një kamion me barnat e nevojshme dhe solucionet infuzive kanë hyrë në në Kosovë mbrëmë dhe pas procedurave do të shpërndahen nëpër institucionet tona shëndetësore”, ka deklaruar Petar Petkoviq – Qeveria e Serbisë.

Por, këto barna akoma nuk kanë arritur në destinacionet brenda Kosovës drejt të cilave ishin nisur.

Dogana e Kosovës i ka treguar Dukagjinit se kjo dërgesë është në mbikëqyrje doganore derisa Ministria e Shëndetësisë të marrë një vendim.

“Një dërgesë me barna donacion është deklaruar për zhdoganim pranë Doganës së Kosovës. E njëjta i është nënshtruar aplikimit për lejim importi pranë Ministrisë së Shëndetësisë së Republikës së Kosovës. Dogana e Kosovës do të trajtojë këtë kërkesë konform procedurave dhe dispozitave ligjore dhe deri në përfundim, dërgesa mbetët nën mbikëqyrje doganore”, kanë thënë nga Dogana e Kosovës.

Për pretendimet se në komunat veriore s’ka furnizim me barna në fillim të tetorit pati reaguar Ministria e Shëndetësisë, duke thënë se këto pretendime janë të pabaza.

“Bëjmë me dije se çdo kërkesë për donacione për Institucionet shëndetësore në komunat me shumicë serbe trajtohet nga komisioni i donacioneve dhe në asnjë rast nuk ka pasur vonesë të asnjë forme. Deri më tani asnjë kërkesë e tillë nuk është refuzuar”- thuhej në reagimin e ministrisë.

Sipas Ministrisë, edhe përkundër mbylljes së përkohshme të pikave kufitare edhe më herët dhe tani, të gjitha produktet që importohen nga Serbia në përputhje me Ligjin për Pajisje dhe Produkte Medicinale, kanë bërë përjashtim.

Drejtori i Qendrës Spitalore Klinike në Mitrovicën e Veriut, Zllatan Ellek më 8 tetor kishte thënë për Transmetuesin Publik të Serbisë (RTS) se problemi me importin e barnave ka lindur rreth dy vjet më parë, “me ardhjen e kryeministrit të Kosovës Albin Kurti në pushtet”.

Ai shpjegoi se blerja e fundit e barnave dhe materialeve është bërë në vitin 2021 dhe se ende po i shfrytëzojnë furnizimet nga ajo blerje.

“Dy tentativat e fundit (prokurimi) dështuan, në kuptimin që ilaçe në vlerë prej 600 mijë eurosh u kthyen mbrapa. Gjoja nuk kanë udhëzime për përdorim në gjuhën shqipe”- ka thënë ai.

Ministria e Shëndetësisë në një përgjigje për KALLXO.com ka thënë se “çdo kërkesë për donacione për institucionet shëndetësore në komunat me shumicë serbe, duke përfshirë edhe donacionet për oksigjen, barna dhe pajisje mjekësore, trajtohet me prioritet nga Komisioni i donacioneve në MSh dhe në asnjë formë dhe as një rast nuk ka pasur asnjëherë vonesa”.

“Mund të shtojmë lirisht dhe me plot siguri se deri më tani kur po flasim, as edhe një kërkesë e natyrës se tillë nuk është refuzuar”- thuhet në përgjigjen e Ministrisë së Shëndetësisë.

Ndërsa më 2 nëntor, shefi i Zyrës së BE-së në Kosovë, Thomas Szunyog, ka njoftuar se ministri i Shëndetësisë, Arben Vitia dhe ekipi i tij kanë aprovuar kërkesën për të furnizuar spitalet dhe qendrat e shëndetit në komunat me shumicë serbe.

Szunyog ka thënë se shpreson që ato do të dorëzohen së shpejti.

“Vlerësojmë miratimin e shpejtë nga ministri i Shëndetësisë Arben Vitia dhe ekipi i tij i kërkesës për ofrimin e barnave dhe furnizimeve mjekësore për spitalet dhe qendrat shëndetësore në zonat e komunitetit me shumicë serbe të Kosovës. Shpresoj se do të dorëzohen shpejt”- ka shkruar ai në platformën X.

Vitia aprovon kërkesën për furnizim të veriut me barna, Szunyog: Shpresoj të dorëzohen shpejt