Spitali i Pejës - Foto: KALLXO.com
Rasti i foshnjës në Pejë: Shkarkohet drejtori mjekësor dhe drejtori për infermieri
Drejtori i Spitalit Rajonal në Pejë ka njoftuar se në kuadër të masave lidhur me rastin e trajtimit të frytit të vdekur ka shkarkuar Drejtorin Mjekësor dhe Drejtorin për Infermieri.
“Shkarkimi është bërë si përgjegjësi direkte menaxheriale lidhur me rastin e frytit të vdekur”- thuhet në njoftimin e spitalit.
Shkarkimet e sotme erdhën pas shkarkimeve të tjera që ndodhën ditëve të kaluara.
Dje, Spitali i Pejës ka njoftuar se ka shkarkuar shefin dhe kryeinfermieren e repartit të Gjinekologjisë, pas dyshimeve se një foshnje e lindur pa shenja jetë u fut në lavatriçe javën e kaluar.
“Sot, si vazhdim i masave disiplinore është shkarkuar Shefi i Repartit të Gjinekologjisë dhe Kryeinfermierja e Repartit të Gjinekologjisë, ndërsa që presim përfundimin e të gjitha procedurave tona disiplinore, por sidomos edhe gjetjet e autoriteteve ligjzbatuese të përfshira në hetim për të ndërmarrë veprimet e mëtutjeshme ndaj cilitdo të përfshirë në këtë rast” – thuhet në njoftim.
Ky spital kishte shkarkuar shtatë punonjës të saj për këtë rast, të mërkurën.
Në njoftimin e bërë sot, Spitali i Pejës ka mohuar akuzat se janë përpjekur që të fshehin rastin ndërsa kanë theksuar se për rastin kanë qenë të informuar edhe ShSKUK-ja.
“Aborti me intervenim kirurgjik ka ndodhur në natën e datës 13.12.2022, ndërsa që ngjarja e frytit të vdekur ka ndodhur më 14.12.2022. Me t’u informuar për ngjarjen, menaxhmenti i Spitalit ka informuar organet e Policisë dhe po atë ditë deri në orë të vona, kemi ofruar bashkëpunimin tonë të plotë tek Policia, Prokuroria e Inspektorati Shëndetësor që kanë qenë në vend të ngjarjes dhe në të njëjtën kohë është informuar mbi ngjarjen drejtoria e ShSKUK” – vazhdon njoftimi.
Një rast i rëndë ka ndodhur javën e kaluar në Spitalin e Pejës. Një foshnje e lindur pa shenja jetë dyshohet se është futur në lavatriçe bashkë me çarçafë.