Ilustrim
Pamjet ku polici kërcënon se do ja vras djalin qytetarit, IPK fillon hetimet
KALLXO.com ka kontaktuar me Inspektoratin Policor të Kosovës në lidhje me kërcënimet e zyrtarit policor ndaj qytetarit në Pejë, dhe të njëjtit kanë konfirmuar se ndaj të njëjtit kanë filluar hetimet.
“Lidhur me rastin që është raportuar të ketë ndodhur në rajonin e Pejës e që është publikuar edhe në media, ju njoftojmë se IPK pasi që është njoftuar për këtë video-incizim kanë kontaktuar me autoritetet policore në Pejë duke kërkuar edhe informacione shtesë për këtë rast”, thuhet në përgjigjen e IPK-së.
Tutje, IPK ka bërë të ditur për KALLXO.com se në lidhje me këtë rast kanë pranuar edhe ankesën e qytetarit në fjalë.
“IPK sot ka pranuar edhe kopjen e ankesës së qytetarit dhe kanë filluar menjëherë me hetime preliminare lidhur me rastin dhe veprimet e zyrtarit policor”, thuhet në përgjigjen e IPK-së.
KALLXO.com ka siguruar një video-incizim, në të cilin shihet një zyrtar i Policisë, duke e kërcënuar një qytetar.
Në pamjet e mëposhtme shihet dhe dëgjohet zyrtari i Policisë duke e kërcënuar qytetarin se nëse nuk e sjell djalin brenda 10 minutave do t’ia tërheqë zvarrë.
“Ngom çka po te them, që s’e bjen qitu për 10 minuta, zhag ta ngrehi, a e ki të qartë?”, dëgjohet polici duke i thënë qytetarit.
Mandej, polici e kërcënon qytetarin edhe me vrasje të djalit.
“Shko bjere qetash fill, je kah vonohesh… Shko bima. Ngom. Kam me ta ngreh zhag që s’vjen për 5 minuta… Vallahi edhe e vras”, dëgjohet duke i thënë polici qytetarit.
Ndërkohë, qytetari shihet të rrethohet edhe nga policë të tjerë.
KALLXO.com merr vesh se incidenti ka ndodhur pasi që djali i qytetarit u ka ikur policëve.
Pamje nga Peja polici e kërcënon qytetarin se do ja vras djalin
