Musliu: Gjendja e sigurisë është stabile, shqetësuese panika e qytetarëve
Kryetarja e Komisionit për Mbikëqyrjen e Agjencisë së Kosovës për Inteligjencë, Ganimete Musliu, ka thënë se Kosova nuk kërcënohet drejtpërdrejtë nga ndonjë pasiguri dhe ka kërkuar nga qytetarët të mos ndjellin panik.
Musliu, këtë deklaratë e ka thënë pas raportimit të drejtorit të AKI-së në këtë komision Petrit Ajeti, i cili u mbajt me dyer të mbyllura për media ku temë e diskutimit ishte çështja e përgjithshme e sigurisë.
“Sot kishim për raportim drejtorin e AKI Petrit Ajeti për të na informuar në detaje për gjendjen e sigurisë në vend. Morëm raportim në detaje për çdo gjë dhe për çështjen e përgjithshme të sigurisë kombëtare”, tha ajo.
Ajo ka siguruar qytetarët që nuk ka vend për panik.
“Dua që përmes juve t`i siguroj qytetarët e Republikës së Kosovës që nuk ka vend për panik, gjendja e sigurisë është stabile. Kujdesi i institucioneve të sigurisë përfshirë edhe AKI është në gjendje gatishmërie dhe në krye të detyrës po i kryen detyrat e veta me përpikëri prandaj nuk ka vend për panik”, tha Musliu.
Shqetësuese sipas saj mbetet paniku i qytetarëve për t`u furnizuar me rezerva në derivate dhe artikuj bazë.
“Përmes juve kërkoj nga presidentja dhe kryeministri të deklarohen për gjendjen e sigurisë në vend sepse te qytetarët është vërejt panik e shtuar të cilët kanë filluar të furnizohen me rezerva të shumta. Është shqetësuese dhe alarmante kur i shohim pompat e derivateve në rreshta të plotë duke u furnizuar me derivate mos të flasim për mjelin e artikuj tjerë bazë”, përfundoi ajo.
