Mjekë nga Turqia operojnë fëmijët me probleme në zemër në QKUK

Një ekip mjekësh e infermierësh nga Turqia do të kryejë operacione te fëmijët me probleme në zemër dhe do të bëjë ekzaminime kardiologjike gjatë 10 ditëve të ardhshme në Qendrën Klinike Universitare të Kosovës (QKUK).

Drejtori i Shërbimit Spitalor Klinik e Universitar të Kosovës (ShSKUK), Elvir Azizi ka falënderuar organizatën britanike “Muntada Aid” dhe Ambasadorin britanik, Jonathan Hargreaves për mbështetjen e dhënë për të realizuar këtë mision.

Ai tha se kjo është një mundësi e mirë që fëmijët e Kosovës të përfitojnë intervenime në zemër, pa pasur nevojë të dalin jashtë vendit.

Mjekët kardiologë, kardiokirurgë, anesteziologë, infermierët e teknikët e anestezionit janë mirëpritur edhe nga këshilltarja e Kryeministrit të Kosovës, Elizabeth Gowing, drejtoresha e Klinikës së Pediatrisë, Violeta Grajqevci, drejtoresha e Klinikës së Radiologjisë, Shkëndije Nuza, u.d. drejtori i Klinikës së Kardiokirurgjisë, Shpejtim Shurdhiqi dhe doktori Ramush Bejiqi.

“Ambasadori i Britanisë së Madhe, Jonathan Hargreaves, u shpreh i lumtur që ky mision humanitar po realizohet dhe që po përfitojnë fëmijët e Kosovës. Në emër të ekipit, foli Dr. Ibrahim Cansaran, i cili po ashtu, shprehu kënaqësinë që kanë mundësinë të ndihmojnë fëmijët e Kosovës” – thuhet në komunikatën e ShSKUK-së.

Sipas mjekut turk, kjo është mundësi e mirë edhe për stafin kosovar që të përfitojë eksperiencë.