Foto: Urim Krasniqi/KALLXO.com
Me procedurë të përshpejtuar, Kuvendi miraton Ligjin për zgjedhjet e përgjithshme
Ligji për zgjedhjet e përgjithshme në Kosovë është miratuar në Kuvend brenda ditës në të dy leximet.
Në parim, ky Ligj u miratua sot rreth orës 12:00 në një seancë e cila në rend të ditës kishte vetëm këtë pikë.
Pas shqyrtimit në lexim të parë, komisioni përkatës rekomandoi shmangien e afateve procedurale dhe përmes një mocioni u vendos që deputetët të mbledheshin në ora 16:30 për ta miratuar këtë Ligj.
Në lexim të dytë 79 deputetë e mbështeten këtë Projektligj, përderisa tre të tjerë abstenuan.
Si rrallëherë gjatë kësaj legjislature, deputetët e partisë në pushtet dhe ata të opozitës janë të të njëjtit mendim sa i përket një çështjeje – Projektligjit për zgjedhjet e përgjithshme në Kosovë. Grupet parlamentare të të gjitha partive janë shprehur pro miratimit të tij.
Kryeministri i Kosovës, Albin Kurti, ka shprehur falenderim për përfundimin me sukses të kësaj reforme zgjedhore.
Ai ka thënë se disa nga çështjet që rregullohen me këtë Projektligj janë: regjistrimi i votuesve jashtë vendit, e drejta e votës, numërimi i votave, mbështetja financiare shtesë për partitë që krijojnë më shumë hapësirë për deputete gra.
Kryetari i grupit parlamentar të PDK-së, Abelard Tahiri, ka thënë se në grupin punues është arritur një përmbledhje nga të gjitha grupet.
Nga Lidhja Demokratike të Kosovës, deputetja Hykmete Bajrami ka thënë se partia e saj e mbështet Projektligjin.
“Duke marrë parasysh që komisioni ka marrë parasysh të adresojë të gjitha rekomandimet e BE-së ne si komision kemi arritur të kemi konsensus të plotë. Grupi parlamentar i LDK-së e mbështet Projektligjin”- ka thënë ajo.
Shefi i grupit parlamentar të AAK-së, Besnik Tahiri, ka thënë një mësim që është marrë nga ky proces është që kur partitë politike vendosin të bëhen bashkë për një qëllim fisnik, ato i tejkalojnë interesat e veta dhe i japin Kosovës dhe sistemit demokratik një ligj që e ka konsensusin e plotë.
Ndërsa, sot gjashtë organizata të shoqërisë civile u janë drejtuar deputetëve të Kuvendit të Kosovës me një letër publike lidhur me reformën zgjedhore.
Sipas tyre, Projektligji i ri për zgjedhjet, përveç teknikaliteteve, përmban edhe ndryshime që cenojnë integritetin zgjedhor, e në anën tjetër nuk adresojnë çështje të cilat do ta përmirësonin nivelin e përfaqësimit demokratik në Kosovë.
“Disa nga ndryshimet më problematike të këtij Projektligji kanë të bëjnë me integritetin e kandidatëve, pavarësinë e KQZ-së dhe votat e kandidatëve”- thuhet në reagimin e tyre.
Shoqëria civile kundër Projektligjit për zgjedhjet: Cenon integritetin zgjedhor
Ligji për zgjedhjet e përgjithshme në Kosovë përcakton rregullat e organizimit të sistemit zgjedhor, duke përfshirë rregullat për përgatitjen, zhvillimin, administrimin, mbikëqyrjen dhe shpalljen e rezultatit të zgjedhjeve për Kuvendin e Republikës së Kosovës.
