Kryeministri i Kosovës, Albin Kurti, Foto: ZKM
Kurti uron Suedinë për anëtarësimin në NATO
Anëtarësimit të Suedisë në NATO i është gëzuar edhe shefi i Qeverisë së Kosovës, Albin Kurti.
Ai përmes një postimi në rrjetin social “X” (ish-Twitter), e ka uruar shtetin suedez për anëtarësimin në NATO, duke ia bërë me dije se pret që ushtarët e Suedisë të vijnë në Kosovë në kuadër të KFOR-it.
“Mezi presim të mirëpresim ushtarët e parë suedezë të KFOR-it në Kosovë për të ndihmuar në mbrojtjen e kufirit tonë kundër agresionit të Serbisë” – u shpreh i pari i Qeverisë.
“Urime Suedisë që u bë anëtari i 32-të i NATO-s. Një NATO më e fortë do të thotë një Europë më e sigurt dhe një shans më i madh për paqe pas pushtimit brutal të Ukrainës nga Rusia” – tha ai.
Congrats to Sweden on becoming @NATO‘s 32nd member. A stronger NATO means a safer Europe and a greater chance for peace after Russia’s brutal invasion of Ukraine. We look forward to welcoming the first 🇸🇪 KFOR soldiers to 🇽🇰 to help defend our border against Serbia’s aggression.
— Albin Kurti (@albinkurti) March 7, 2024
Një urim për këtë ngjarje u bë edhe nga presidentja e vendit, Vjosa Osmani e cila bashkë me ambasadorin suedez në Kosovë, Jonas Westerlund e me miq e aleatë të tjerë festuan sot.
Suedia është bërë anëtare e NATO-s pasi e kompletoi procesin e anëtarësimit të enjten në Shtetet e Bashkuara.
Dorëzimi i dokumenteve u bë gjatë një ceremonie në Uashington, dy vjet pasi Suedia aplikoi për t’iu bashkuar aleancës ushtarake, menjëherë pasi Rusia e nisi pushtimin e Ukrainës.
Kryeministri i Suedisë, Ulf Kristersson, tha se “uniteti dhe solidariteti” do të jenë “frymëzuesit” e Suedisë.