Kurti: Nuk kemi dallime me LDK-në për tarifën ndaj Serbisë

Largimi i menjëhershme i tarifës 100 për qind ndaj produkteve të Serbisë ka shpërfaqur qëndrime të ndryshme mes partnerëve të koalicionit qeveritar, LDK dhe LVV.

Pas deklaratave të senatorit Perdue për largimin e tarifës ose tërheqjen e trupave amerikane nga Kosova, kryetari i LDK-së, Isa Mustafa ka thënë qëndrimi i kësaj partie është heqja pa kushte e tarifës, ndryshe nga kryeministri i cili po insiston me zëvendësimin e tarifës me reciprocitet.

Lidhur me dallimet mes dy partive, kryeministri i Kosovës, Albin Kurti në një përgjigje për KALLXO.com ka thënë se nuk kanë dallime por “diferenca”.

“Nuk besoj që kemi dallime, natyrisht që kemi diferenca. Mirëpo, ka diferenca edhe brenda gjitha subjekteve politike”, tha shkurt Kurti.

Kryeministri tha kështu sonte në Podujevë ku ka shkuar për ta mbështetur kandidatin e partisë së tij, Shpejtim Bulliqin, për kryetar të Komunës, për zgjedhjet e 15 marsit.

Kryeministrit Albin Kurti po i kërkohet që menjëherë të heq tarifën 100 për qind, pas paralajmërimeve të ShBA-së, për tërheqjen e trupave amerikane nga Kosova.

Kurti: Trupat amerikane nuk tërhiqen, taksa zëvendësohet me reciprocitet

Albin Kurti ka folur edhe lidhur me paralajmërimet e sotme për tërheqjen e trupave amerikane nga Kosova. Ai tha se trupat e KFOR-it nuk do të tërhiqen dhe që ky vendim nuk ka të bëjë me tarifën.

Ai ka përsëritur qëndrimin e tij lidhur me heqjen graduale të tarifës 100 % dhe vendosjen e reciprocitetit.

“Unë nuk mendoj që KFOR-i duhet të tërhiqet nga Kosova, përkundrazi nuk besoj që do tërhiqet. Kemi parë një dëshirë të djalit të presidentit Trump por kjo nuk ka të bëjë me tarifën. Nëse ajo dëshirë bëhet vendim i Donald Trumpt kjo sërish nuk ka të bëjë më tarifën por ka të bëjë më një reduktim të trupave që kanë bërë edhe në Afganistan edhe në Siri. Unë besoj që ShBA-të duhet të qëndrojnë në të gjitha format e tyre në Kosovë; me ambasadë, me ekonomi, me kulturë, me mbrojtje. Jemi për partneritet dhe aleancë të fuqishme. Ne do ta heqim tarifën 100 për qind në mënyrë graduale , duke e zëvendësuar me reciprocitetin gradual. Jam i bindur qe kjo është rruga e duhur dhe qëndrimi më racional dhe i dobishëm për vendin tonë”, ka thënë Kurti pas fushatës zgjedhore në Podujevë.