Qyteti i Suherekës
Komuna e Suharekës nënshkruan kontratë rreth 9,500 euro për dezinfektim
Në kohën kur Kosova dhe gjithë bota po lufton kundër pandemisë COVID – 19, Komuna e Suharekës ka nënshkruar një kontratë për dezinfektim të hapësirave publike.
Tenderi për këtë shërbim është iniciuar me datë 12 mars, kurse për këtë tender ka aplikuar vetëm një operator ekonomik, që edhe është shpallur fitues. Procedura ka qenë emergjente dhe e negociuar, pa publikim të njoftimit për kontratë.
Vlera e përgjithshme e kontratës me titull ‘Shërbimet e dezinfektimit në Komunën e Suharekës’ është 9,482 euro, kurse është nënshkruar me 13 mars 2020.
Në informacione shtesë në kontratë thuhet se është nënshkruar me 13 mars, për rast urgjent, kurse është protokolluar tre ditë më pas, me 16 mars, me arsyetimin se në datën kur është nënshkruar, nuk ka pasur rrjet në zyre.
Kompania që e ka fituar tenderin është ‘Vector Pest Control SH.P.K’.
Kurse sipas një njoftimit të Komunës së Suharekës, dezinfektimi i rrugëve në qytet dhe në fshatra ka filluar me datë 17 mars, në bashkëpunim me Njësinë e Zjarrëfikësve dhe me disa kompani.
Ndërsa për situatën e krijuar, Komuna e Suharekës ka ndarë 20 mijë euro nga Fondi Emergjent.
