Ish-kryetari i partisë IRDK propozohet për bord të AKP-së

Qeveria e Kosovës ka propozuar tetë emra për bordin e Agjencisë Kosovare të Privatizimit.

Ndër ta është edhe ish-kryetari dhe ish-deputeti i partisë Iniciativa e Re Demokratike e Kosovës (IRDK), Xhevdet Neziraj.

Këtë e ka konfirmuar për KALLXO.com, Elbert Krasniqi, kryetar i IRDK-së dhe ministër i Administrimit dhe Pushtetit Lokal.

“Është ish-deputeti Neziraj”, ka thënë ai për KALLXO.com.

Partia Iniciativa e Re Demokratike e Kosovës është në koalicion me Lëvizjen Vetëvendosje.

Neziraj ka qenë deputet i Kuvendit të Kosovës nga viti 2004 deri në vitin 2010.

Bashkë me Nezirajn, për bordin e AKP-së janë propozuar edhe Syzana Dautaj- Surdulli, Mentor Hyseni, Vjollca Jashari, Violeta Arifi- Krasniqi, Xhevdet Neziraj, Halim Muqolli, Avni Ajdini dhe Nazmi Mikullovci

Kryeministri i Kosovës, Albin Kurti ka thënë se ky do të jetë bordi i fundit të AKP-së.

Sot gjatë ditës KALLXO.com raportoi se ish anëtari i LDK-së, Halim Muçolli po ashtu është propozuar të  jetë pjesë e këtij bordi.

Për këtë bord është propozuar edhe njeriu i Vetëvendosjes, Nazmi Mikullovci, i cili ka qenë kryesues i Komitetit për Industri në LVV.

Për anëtar të bordit të AKP-së është propozuar edhe ish-kandidati i Vetëvendosjes për deputet, Mentor Hyseni.