Gjilani shpërndan 31 mëshqerra për blegtorët

Drejtoria e Bujqësisë në Gjilan e mbështetur nga organizata për zhvillim rural “Mëshqerra”, ka shpërndarë sot 31 mëshqerra barsë për blegtorët e kësaj komune.

Sipas një komunikate për media, në ceremoninë e shpërndarjes, nënkryetari i Gjilanit, Arbër Ismajli, ka thënë se konkurrenca për ndarjen e tyre ka qenë e madhe.

“Në emër të kryetarit Haziri, sot po i shpërndajmë këto gjedhe, që është faza e dytë e projektit. Konkurrenca që i janë nënshtruar bujqit në bazë të thirrjes publike, ka qenë jashtëzakonisht e ashpër, pasi numri i aplikuesve e kalon numrin 100. Faleminderit partnerëve që kanë kontribuar dhe uroj që blegtorët t’i shfrytëzojnë në mënyrën më të mirë”, ka thënë Ismajli.

Drejtori i Bujqësisë në Gjilan, Ramiz Ramadani, tha se për fat të mire, Gjilani e ka industrinë e qumështit jashtëzakonisht të zhvilluar që sot funksionin me 50 përqind të kapaciteteve.

“Nuk e di që ka mënyrë më të mirë për ta nisur këtë vit se sa duke e rritur fondin blegtoral edhe për 31 krerë mëshqerra barsë të racës së pastër Hollshtajn. Ky është kontigjenti i dytë që iu dedikohet blegtorëve. Një falënderim të veçantë për OZHR Mëshqerra, për mbështetjen e madhe në realizimin e këtij projekti, për t’i dalë në mbështetje bujqve. Interesimi i madh i fermerëve na bën që të vazhdojmë me këtë projekt edhe në të ardhmen”, ka thënë Ramadani.

Ai tha se janë përzgjedhur fermerët që kultuivojnë një deri në katër krer lope, ndërkohë që Komuna për çdo krer mëshqerre përticipon me 800 euro.

Kurse, drejtoresha e organizatës për zhvillim rural “Mëshqerra”, Florentina Kida-Gërguri, tha se falë punës së palodhshme të Komunës së Gjilanit dhe të Drejtorisë së Bujqësisë, kanë arritur që ta përmbyllin edhe projektin e dytë me sukses.

“Kjo është vetëm në të mirë të fermerëve të Gjilanit. Është bërë një punë shumë e madhe në terren, ku e kemi pasur shumë të vështirë në përzgjedhjen e përfituesve. Aty ku punohet drejtë, si në rastin e Gjilanit, ne gjithmonë do të jemi mbështetës të parezervë”, tha ajo.

KALLXO.com kishte raportuar në dhjetor të vitit të kaluar se Prokuroria në Gjilan kishte filluar hetime për donacionin e 100 mijë eurove, ku fermerëve të Gjilanit iu ndanë 35 krerë lopë nga po e njëjta organizatë.

Kurse,organizata për Zhvillim Rural “Mëshqerra” kishte reaguar pas fillimit të hetimeve nga Prokuroria në Gjilan për donacionin e lopëve për fermerët e Gjilanit, duke thënë se nuk ka asnjë shkelje në donacionin e 35 lopëve.

Oranizata “Mëshqerra”: Nuk ka asnjë shkelje në donacionin e 35 lopëve