Detaje nga takimi Konjufca - Gjukanoviq
Aktualiteti politik, zhvillimet në rajon, agresioni rus si dhe thellimi i bashkëpunimit ndërshtetëror kanë qenë disa nga temat e diskutuar mes kryetarit të Kuvendit të Kosovës, Glauk Konjufca dhe presidentit të Malit të Zi, Milo Gjukanoviq.
Sipas komunikatës për media të Kuvendit, Konjufca e ka falënderuar Gjukanoviqin për ndihmën që vendi i tij ia ka dhënë Kosovës.
“Kryetari Konjufca shprehu mirënjohje për mbështetjen e presidentit Gjukanoviq dhe Malit të Zi ndaj Kosovës, derisa theksoi se forcimi i mëtejmë i raporteve të ndërsjella fqinjësore është një kontribut shtesë për stabilitetin në Ballkan dhe perspektivën e përbashkët euroatlantike”, thuhet në komunikatë.
Në këtë takim, sipas komunikatës presidenti malazez ka konfirmuar mbështetjen për Kosovën.
“Me rastin e vizitës së tij të parë në Kosovë, presidenti Gjukanoviq e falënderoi Kryetarin e Kuvendit për pritjen dhe konfirmoi mbështetjen e Malit të Zi për anëtarësimin e Kosovës në Këshillin e Evropës dhe organizatat tjera ndërkombëtare”, thuhet në komunikatë.
Gjukanoviq poashtu ka shprehur domosdoshmërinë e integrimit të të gjitha shteteve të Ballkanit Perëndimor në Bashkimin Evropian.
Me ftesën e presidentes Vjosa Osmani, presidenti i Malit të Zi, Milo Gjukanoviq është duke zhvilluar një vizitë zyrtare në Kosovë.
Ai gjatë ditës pritet të zhvilloj takim edhe me përfaqësues të partive politike në vend.
