Ilustrim - Logot e partive politike kosovare
Kaq vota kishin në zgjedhjet e kaluara prijësit e listave të partive politike
Dje shumica e partive politike të Kosovës kanë bërë publike listat me emrat e kandidatëve për deputetë me të cilët do të garojnë në zgjedhjet e parakohshme të 14 shkurtit.
Me përjashtime të rralla, në krye të listave janë kryesisht njerëzit kyçë të subjekteve politike.
Dallimin më të madh e ka bërë Lëvizja Vetëvendosje, e cila në krye të listës përveç emrit të liderit, Albin Kurti, ka vendosur edhe babanë e aktivistëve të ndjerë të LVV-së, Arbënor e Astrit Dehari, Avni Dehari, si dhe viktimën e dhunës seksuale të luftës, Vasfije Krasniqi.
Në këto zgjedhje Vetëvendosje garon së bashku me iniciativën e ushtrueses së detyrës së presidentes, Vjosa Osmani, e cila në listë është e dyta.
Edhe LDK-ja ka formuar listë të përbashkët me AKR-në e Behgjet Pacollit.
Listat i kanë publikuar edhe PDK dhe AAK.
Risi te partia e Ramush Haradinajt është numri 2, mjeku Shemsedin Dreshaj, i cili deri më tani nuk ka qenë pjesë e asnjë gare zgjedhore.
Ndërsa, te PDK-ja në krye të listës janë kryesisht emra të njohur të partisë.
7-të parët e LVV-së, njerëzit më të votuar në zgjedhjet e kaluara
Prijësi i listës së kandidatëve të LVV-së, Albin Kurti është edhe njeriu më i votuar në Kosovë në zgjedhjet e 6 tetorit të vitit 2019.
Sipas rezultateve të publikuara nga Komisioni Qendror i Zgjedhjeve (KQZ), Kurti grumbulloi 183,952 vota.
Numri dy i listës së LVV-së është Vjosa Osmani.
Osmani në zgjedhjet e 6 tetorit 2019 kishte kandiduar për postin e kryeministres në kuadër të LDK-së duke marrë 176,016 vota në total.
Glauk Konjufca, i cili mban numrin 3 në listën e LVV-së kishte qenë njeriu i 5-të më i votuar në zgjedhjet e kaluara.
Ai në zgjedhjet e 6 tetorit 2019 ka marrë 72,686 vota.
Gruaja e dytë me e votuar në Kosovë në zgjedhjet e kaluara është ish-ministrja e Drejtësisë, Albulena Haxhiu.
Haxhiu e cila në listën e LVV-së ka numrin 6, në zgjedhjet e kaluara kishte marrë hiç më pak se 46,831 vota.
Ish- ministri i Shëndetësisë, Arben Vitia, i cili në listën e LVV-së mban numrin 7, në zgjedhjet e fundit ka marrë 26,106 vota.
LDK-ja e prirë nga Avdullah Hoti e Kujtim Shala
Lidhja Demokratike e Kosovës (LDK) në zgjedhjet e 14 shkurtit pritet të garojë në listë të përbashkët me Aleancën Kosova e Re (AKR).
Kësaj liste do t’i prijë kryeministri në detyrë, Avdullah Hoti, i cili sipas të dhënave të KQZ-së është njeriu i 12-të më i votuar në Kosovë në zgjedhjet e kaluara.
Hoti në zgjedhjet e 6 tetorit 2019 kishte marrë 26,094 vota.
Më shumë vota se Hoti kishte marrë ish-deputeti Kujtim Shala, i cili në listën e LDK-së për zgjedhjet e 14 shkurtit është i dyti.
Shala në zgjedhjet e kaluara kishte marrë 38,921 vota.
Ministrja në detyrë e Financave, Hykmete Bajrami, e cila në listën e LDK-së mban numrin 3, në zgjedhjet e kaluara kishte marrë 8,344 vota.
Kryetari AKR-së, Behgjet Pacolli, do të ketë numrin 5 në listën e përbashkët me LDK-në.
Pacolli në zgjedhjet e kaluara kishte kandiduar në listë të përbashkët me Nismën Socialdemokrate. Në ato zgjedhje kishte marrë 10,512 vota.
Numrin 6-të në listën e LDK-së e ka kryetarja e Forumit të Gruas së LDK-së, Lirije Kajtazi, e cila në zgjedhjet e kaluara kishte marrë 8,664 vota.
Enver Hoxhaj njeriu i 4-të më i votuar në PDK
Nga lista e Partisë Demokratike të Kosovës (PDK) në zgjedhjet e 6 tetorit 2019 më së shumti vota pas kryetarit Kadri Veseli, kishte pasur ish-deputeti Uran Ismaili.
Ismaili, i cili në listë për zgjedhjet e 14 shkurtit është i dyti, kishte marrë 28,188 vota.
Pas Ismailit më së shumti vota kishte marrë ish-deputeti Bedri Hamza, 15,599 vota.
Enver Hoxhaj i cili do t’i prijë listës së PDK-së, në zgjedhjet e kaluara kishte marrë 11,052 vota.
52 vota më pak se Hoxhaj i kishte marrë ish-deputeti Memli Krasniqi.
Ndërsa ish-deputetja Eliza Hoxha kishte marrë 9,258 vota.
Ramush Haradinaj, prijësi i listave të AAK-së
AAK-ja në zgjedhjet e 6 tetorit 2019 kishte kandiduar së bashku më PSD-në.
Edhe në këto zgjedhje listës i kishte prirë ish-kryeministri Ramush Haradinaj duke marrë 76,163 vota.
Numrin 3 në listën e AAK-së e ka ish-deputetja Time Kadrijaj, e cila në zgjedhjet e kaluara kishte marrë 8,122 vota.
Bekë Berisha mban numrin 4 në listën e AAK-së. Berisha në zgjedhjet e fundit kishte marrë 11,959 vota.
Ndërsa zëvendëskryeministri në detyrë, Besnik Tahiri kishte marrë 5.247 vota.
Albena Reshitaj, e cila në listën e AAK-së ka numrin 6, në zgjedhjet e kaluara kishte marrë 6,018 vota.