Kryetari i Mitrovicës së Veriut i ruan paratë në Beograd
Kryetari i rizgjedhur i Mitrovicës së Veriut, Goran Rakiq, ka deklaruar se ka 50 mijë euro para të gatshme, të cilat po i ruan në banka në Beograd.
Në regjistrin e deklarimit të pasurisë, kreu i rizgjedhur i Komunës së Mitrovicës së Veriut ka deklaruar se posedon pasuri të paluajtshme në vlerë prej 450 mijë euro.
Në anën tjetër, pasuria e luajtshme e kryetarit Rakiq përfshin një veturë ne vlerë 10 mijë euro.
Goran Rakiq ka deklaruar se nuk ka borxhe.
Paga e tij është 1 mijë e 76 euro.
Gjithashtu, ai ka deklaruar edhe të ardhurat e familjarëve të tij.
Bashkëshortja e Goran Rakiqit merr pagë 600 euro në Fakultetin Ekonomik në Mitrovicën e Veriut.
Kurse prindi i tij merr pension 200 euro.
Në katër komunat veriore të Kosovës, përfshirë Komunën e Mitrovicës së Veriut, në muajin që shkoi u mbajtën zgjedhje të parakohshme.
Këto zgjedhje erdhën si rezultat i dorëheqjeve të kryetarëve të katër komunave. Në mesin e kryetarëve është edhe Goran Rakiq, i cili u rizgjodh kryetar i Komunës së Mitrovicës së Veriut.