Ashensorët e Pallatit të Drejtësisë Jashtë Funksionit
Që nga e premtja e javës së kaluar, ata që duan të vizitojnë Pallatin e Drejtësisë në Prishtinë dhe synojnë katet e larta të këtij pallati, këtë duhet ta bëjnë në këmbë sepse ashensorët janë jashtë funksionit.
Ashensorët nuk janë duke funksionuar në tërë kompleksin e Pallatit të Drejtësisë, duke përfshirë këtu Gjykatën Themelore të Prishtinës, Gjykatën e Apelit si dhe Prokurorinë Themelore të Prishtinës.
KALLXO.com ka vërtetuar mos-funksionimin e ashensorëve përmes pamjeve të kamerave. Xhirimet tregojnë ashensorët e mbyllur ndërsa punëtorët dhe vizitorët shfrytëzojnë shkallët për t’u ngjitur në katet e larta.
Gjithashtu përpos ashensorëve, jashtë funksionit janë edhe shkallët lëvizëse që janë të vendosura në objektin e Gjykatës Themelore të Prishtinës.
Por mbi të gjitha, mos-funksionimi i ashensorëve mund të krijojë vështirësi në sjelljen e të dyshuarve në pallat pasi që kjo bëhet përmes ashensorëve të veçantë.
KALLXO.com lidhur me mos-funksionimin e ashensorëve kontaktoi me kryetarin e Gjykatës Themelore të Prishtinës, Hamdi Ibrahimin, i cili nuk deshi të komentojë lidhur me këtë.
“Nuk kam koment, qe një vit e kam paralajmërua këtë që është duke ndodhur”, tha shkurt Ibrahimi.
KALLXO.com për mosfunksionimin e ashensorëve të pallatit të drejtësisë përmes e-mailit kërkoi përgjigje edhe nga Ministria e Administratës Publike por nuk pranoi përgjigje.
Pallati i Drejtësisë, disa herë është ballafaquar me probleme të ashensorëve, e në disa raste ka pasur edhe ngujim të stafit që punon në pallat në ashensorë.
Telashet në Pallatin e Drejtësisë kanë qenë temë e një emisioni të “jeta në Kosovë” gjatë muajit të kaluar.
