Thaçi duke votuar më 22 tetor | Foto: KALLXO.com
Thaçi: Zgjedhjet do të jenë Fer
Presidenti Hashim Thaçi në një postim në Facebook shkroi se raundi i dytë i zgjedhjeve lokale do të jetë fer dhe demokratik.
“Jam i sigurt se procesi i nesërm zgjedhor do të jetë fer, demokratik dhe i bazuar në standardet evropiane, që tashmë i kemi vendosur si shoqëri”, shkroi Thaçi në ditën kur po zhvillon një vizitë në Kanada.
Thaçi në postimin e tij foli edhe për fushatën pesëditëshe të balotazhit.
“I përgëzoj partitë politike dhe kandidatët për fushatën e dinjitetshme elektorale, kurse shoqërinë civile dhe mediat për angazhimin dhe raportimin korrekt”, vijoi shkrimi i Thaçit në Facebook.
Ai u bëri thirrje qytetarëve që të dalin në zgjedhje për të përcaktuar me votën e tyre kryetarët e komunave për katër vjetët e ardhshëm.
Balotazhi i nesërm zhvillohet në gjysmën e komunave të Kosovës.