Përmbytje në Shqipëri - Foto: Rtv21

Moti i Lig në Shqipëri Shkakton Viktimën e Parë

Stuhia që ka përfshirë pasditen e sotme Shqipërinë, ka shkaktuar viktimën e parë në Fier.

NDËRLIDHUR

Ai është 50-vjeçari Sabri Vriga, i cili është goditur nga rryma elektrike, derisa po riparonte një defekt në fshatin Krujan.

Ndërkohë, moti i keq dhe reshjet e shiut përmbyten akset nacionale.

Autostrada Tiranë-Durrës është bllokuar për shkak se niveli i ujit shkoi deri në lartësinë e trafik-ndarëses.

Për këtë arsye policia devijoi trafikun në rrugët dytësore.

Shumë mjete mbeten të bllokuara në rrugë, ndërsa niveli i ujit po rritet.

Edhe rruga drejt aeroportit pati probleme me trafikun.

Disa biznese në zonë janë përmbytur.

Edhe në Tiranë ka probleme me banesat e ulëta, ndërsa për shkak të shikueshmërisë së ulët ndodhi edhe një aksident në zonën e Unazës së Re në Tiranë, por fatmirësisht pa viktima.

Rruga e Kombit në zonën e Milotit është bllokuar për një kohë të gjatë dhe sipas drejtuesve të automjeteve që ndodhen atje, ka ndodhur edhe një aksident me pasojë tre të lënduar.

Telashe nga stuhia dhe përmbytjet ka pasur edhe në pjesë tjera të Shqipërisë.

Problemet nga përmbytjet janë diskutuar edhe në Kuvendin e Shqipërisë.

Kryeministri Edi Rama tha se kjo është një situatë e parashikuar dhe se Qeveria ka marrë të gjitha masat e mundshme.

“Tani që flasim, të gjitha forcat e organizuara të emergjencave, të ushtrisë, të policisë, prefektët dhe të gjitha strukturat e pushtetit vendor pa dallim janë të angazhuara. Po ashtu edhe sa i përket shërbimit shëndetësor, është në gatishmëri të plotë” tha Rama. /21Media

30 Nëntor 2017 - 21:09

RTV 21 30/11/2017 - 21:09
NDËRVEPRIMI8