Vëllaznimi në krizë të thellë, drejtuesit e klubit premtojnë ndryshim të situatës
Klubi i KF Vëllaznimi po përballet më një krizë të radhës. Në tre ndeshjet e fundit në kuadër të Ligës së Parë në Futbollin Kosovar, Vëllaznimi ka zhvilluar ndeshjet me Juniorë.
Në ndeshjet e para u mendua që Vëllaznimi do të jetë kandidati kryesor për t`u rikthyer vitin e ardhshëm në Superligë, por pas disa ndeshjeve të mira në fillim në klubin gjakovar filloi një krizë.
Pas 14-të ndeshjeve të zhvilluara Vëllaznimi gjendet në pozitën e katër me 21 pikë, gjashtë pikë larg vendit të parë që siguron kalimin në Superligën e Kosovës në Futboll.
Fillimisht Vëllaznimi në fillim të sezonës angazhoi trajneri, Granit Begollin, por që ky i fundi u largua nga Klubi. Pos Begollit gjatë ditës së djeshme nga klubi është larguar edhe Adnan Haxhaj.
Kallxo.com ka kontaktuar me drejtuesit e klubit për të marrë një prononcim lidhur me gjendjen e klubit.
Drejtuesit e klubit thonë se lojtarët janë tash e 2 muaj pa paga.
“Lojtarët kanë bojkotuar ndeshjet për arsye se tash e dy muaj ata nuk kanë marrë rrogë”, thonë nga klubi i Vëllaznimit.
Po ashtu nga drejtuesit e klubit është bërë e ditur se prej largimit të Agim Canajt, klubi nuk ka donatorë.
“Prej kur ka shkuar Agim Cana, Vëllaznimi ka mbetë pa donatorë”, thonë drejtuesit e klubit.
Lidhur me atë se a janë përkrahur nga Komuna, drejtuesit e klubit kanë treguar edhe shifrën që Komuna ka investuar për klubin e qytetit të Gjakovës.
“Komuna na ka ndihmuar këto 3 vitet e fundit, nga Komuna për këto 3 vite kemi marrë rreth 35 mijë euro”.
Drejtuesit e klubit nuk e përjashtojnë mundësinë që klubi të shndërrohet në Shoqëri Aksionare por që në momentin që shndërrohet në Shoqëri Aksionare duhet të plotësohen disa kushte.
“Kuvendi i Klubit i përbërë nga 17 anëtarë ka marrë vendim që t`i ndryshohet statusi klubit, prej OJQ-së në Shoqëri Aksionare, por që deri më sot nuk ka ndonjë investitorë konkret”.
Investitori duhet t`i plotësojë disa kushte nëse dëshiron që të marrë KF Vëllaznimin.
“Selia duhet të jetë në Gjakovë, nuk duhet ti ndryshohet emri klubit e as nuk duhet të ndryshohen ngjyrat e klubit. Po ashtu investitori duhet të ketë një plan program 5 vjeçar që të udhëheqë me klubin”, thonë nga KF Vëllaznimi.
Ata premtojnë që do të angazhohet maksimalisht që kjo gjendje të përmirësohet.
Edhe tifozët e flaktë të këtij klubi gjatë ditës së djeshme kanë reaguar për gjendjen në të cilën gjendet klubi i tyre i zemrës.
