Xhavit Haliti
Avokati: Xhavit Haliti ka imunitet gjatë ushtrimit të detyrës zyrtare
Deputeti i PDK-së, Xhavit Haliti ka publikuar deklaratën e avokatit të tij, Kujtim Kerveshit në lidhje me ngritjen e aktakuzës ndaj tij për sulm ndaj deputetit, Arben Gashi.
Avokati i Halitit, thotë se rasti në fjalë nuk ka të bëjë me vepër penale.
“Ju njoftoj se kam pranuar aktin akuzues të Prokurorisë Themelore në Prishtinë. Konsideroj se në rastin konkret nuk kemi të bëjmë me vepër penale”, ka shkruar Haliti në Facebook, në emër të avokatit të tij, Kujtim Kërveshi.
Avokati pretendon se Xhavit Haliti, si deputet ka pasur imunitet dhe se Prokuroria ka ndërhyrë në institucionet ligjore të njohura.
“Edhe po të kishte vepër penale për të mbrojturin tim, konsideroj se Prokuroria e Shtetit ka ndërhyrë në institucione ligjore të njohura edhe pse do të duhet të kishte parasysh kufizimin e autoritetit të saj ndaj imunitetit funksional duke qenë se bëhet fjalë për një situatë gjatë së cilës deputetët e Kuvendit të Republikës së Kosovës kanë qenë duke ushtruar detyrën zyrtare”, thuhet tutje në reagimin e avokatit, Kujtim Kërveshi.
Mirëpo, në të kaluarën, deputetët e Kuvendit të Kosovës janë arrestuar, ndaj tyre ishte ngritur aktakuzë e madje edhe janë dënuar nga Gjykata për veprat që i kanë bërë brenda Kuvendit të Kosovës.
Gjykata e Prishtinës e kishte dënuar me burgim me kusht për hedhje të gazit lotsjellës deputetët, Albin Kurti, Donika Kadaj-Bujupi, Faton Topalli dhe Albulena Haxhiu.
Deputetja Albulena Haxhiu për përdorim të armës është dënuar me 1 vit e 2 muaj burgim. Për pengim të personit zyrtar me 4 muaj. Dënimi unik: 1 vit e 3 muaj.
Donika Kadaj-Bujupi për përdorim të armës është dënuar me 1 vit e 3 muaj, për pengim të personit zyrtar me 6 muaj burgim. Dënim unik: 1 vit e 6 muaj.
Ndërsa, deputeti Faton Topalli për përdorim të armës është dënuar me 1 vit burgim dhe për pengim të personit zyrtar me 3 muaj burg. Dënimi unik: 1 vit e dy muaj.
Deputeti Xhavit Haliti akuzohet për veprën penale të sulmit me pretendimin se e ka sulmuar deputetin e LDK-së Arben Gashin, ndërsa Gani Dreshajn Prokuroria e akuzon me veprën penale të kanosjes pasi që siç thuhet në aktakuzë Dreshaj më pas e kishe kanosur deputetin Arben Gashi.
https://kallxo.com/perleshje-mes-xhavit-halitit-e-arben-gashit-ne-kuvend/