Limaj dhe të Tjerët Deklarohen të Pafajshëm

Fatmir Limaj dhe katër të akuzuarit tjerë për shpërdorim detyre dhe krim të organizuar u deklaruan të pafajshëm.

Fatmir Limaj, Nexhat Krasniqi, Endrit Shala, Shpëtim Telaku dhe Florim Suka pafajësinë e deklaruan, pasi iu lexua aktakuza e konsoliduar për dy rastet e bashkuara që lidhen me ish-Ministrinë e Transportit dhe Telekomunikacionit.

Dhëmbi i Nxjerrë i Limajt si Dëshmi në Gjykatë

Pasi u ankua për dhimbje dhëmbi dhe seanca u shty për këtë arsye, Limaj ia dëshmoi gjykatës se e ka nxjerrë atë.

Tahir Rrecaj, avokati i Limajt me të nisur seanca e shtyrë për orën 14:00, solli në gjykatë dëshminë mjekësore se Limaj e ka nxjerrë dhëmbin.

Përveç kësaj dëshmie, gjykatës iu prezantua edhe dhëmbi i nxjerrë.

Edhe pse në kohën kur seanca ende vazhdonte, prokurori dhe mbrojtja u pajtuan që aktakuza të konsiderohej e lexuar, prokurori tha se atë do të fillojë ta lexojë tash.

Kur avokati Blerim Prestreshi reagoi duke thënë se më herët aktakuza u konsiderua e lexuar, gjyqtarja tha se kjo ndodhi pasi Limaj nuk ndihej mirë, ndërsa shtoi se ai tash mund të qëndrojë në seancë.

Fatmir Limaj Ankohet për Dhimbje Dhëmbi-Shtyhet Seanca

Seanca e gjykimit ku Limaj akuzohet për shpërdorim detyre është shtyrë deri në orën 14:00.

Gjatë seancës së sotme Fatmir Limaj u ankua për dhimbje dhëmbi, ndërsa gjykata dha një pauzë që ai ta trajtojë këtë dhimbje.

Por edhe pas pauzës Limaj kërkoi shtyrje të seancës, ngase deklaroi se vazhdon të ndiejë dhimbje të fortë dhëmbi.

Avokati i tij Tahir Rrecaj tha se Limajt i duhet një konsultë te dentisti.

Prokurori Charles Hardaway e kundërshtoi shtyrjen e seancës, duke thënë se e kupton gjendjen e Limajt, por dyshon se shtyrja po kërkohet që Limaj të marrë pjesë në takimin e opozitës të paralajmëruar nga mediat për orën 16:00 të ditës së sotme.

Shpresoj që nuk do të ketë fotografi ku do të shihet Limaj duke marrë pjesë në atë takim, tha Hardaway.

Këto fjalë të prokurorit, avokati Tahir Rrecaj i quajti spekulim, sepse edhe ashtu sipas Rrecajt gjykimi do të përfundonte në orën 16:00, ndërsa për Limajn tha se asnjëherë nuk i është shmangur gjykatës.

Endrit Shala, njëri nga të akuzuarit e këtij procesi tha për KALLXO.com se takimi i paralajmëruar i opozitës për sot varet nga zhvillimet në seancë dhe kohëzgjatja e saj.

Limaj pastaj në seancë procesin gjyqësor kundër tij e konsideroi një lojë që sipas tij po zgjat që gjashtë vjet.

Kjo është një lojë me mua. Ju si gjykatë po lejoni të luhet me mua, tha Limaj.

KALLXO.com shkroi sot se Limaj deri në fund të javë do t’i ketë 7 paraqitje në gjykatë për 35 ditë.

Jennifer Seal, njëra nga anëtaret e trupit gjykues tha se paska ilaçe për dhimbje dhe i ofroi Limajt ato.

Avokati Arianit Koci tha pastaj se Limaj “me dhimbje e gjakderdhje nuk mund ta vazhdojë gjykimin”.

Limaj u pyet nga gjyqtarja se si ndihej. Tha se “unë kam kërkuar të lirohem e ju nuk po më lironi”.

Aktakuza e procesit ku Limaj po akuzohet për shpërdorim detyre u konsiderua e lexuar, pasi një gjë të tillë e kërkoi avokati i Limajt Tahir Rrecaj, ndërsa prokurori Charles Hardaway nuk kishte kundërshtim.