Vendimi i fundit i Gjykatës lidhur me të dyshuarin për vrasjen në lokalin 'Bon Vivant'

Andi Pajazitit, i dyshuar për vrasjen e Kastriot Ramadanit në lokalin ‘Bon Vivant’ në muajin gusht 2023, i është vazhduar masa e paraburgimit nga Gjykata e Prishtinës pas kërkesës së Prokurorisë.

Këtë për Kallxo.com e ka konfirmuar zëdhënsja e Gjykatës së Prishtinës, Mirlinda Gashi e cila ka treguar po ashtu detaje të tjera lidhur me këtë masë të sigurisë.

“A. P. i është vazhduar masa e paraburgimit në kohëzgjatje prej dy muaj. Masa e paraburgimit të pandehurit i është vazhduar deri më datë 05.03.2024” – ka thënë zëdhënja e Gjykatës së Prishtinës.

Pajazitit i ishte shqiptuar masa e paraburgimit që nga 7 gushti i këtij viti së bashku me të dyshuarit Hisni Gecaj dhe Gëzim Zakuti.

Por Gecaj dhe Zakuti ishin liruar nga kjo masë pas kërkesës së Prokurorisë.

Për herë të fundit Andi Pajazitit i ishte vazhduar paraburgimi më 11 nëntor të vitit të kaluar me vendim të gjyqtarit të procedurës paraprake Kushtrim Shyti.

Konform këtij vendimi paraburgimi ishte paraparë të zgjaste deri më 5 janar 2024.

Sipas dosjes së Prokurorisë, të siguruar nga KALLXO.com, Andi Pajaziti, Gëzim Zakuti, Dukagjin Nikollaj dhe tashmë i ndjeri Kastriot Ramadani, së bashku me një person ende të paidentifikuar rreth orës 23:17 të 4 gushtit gjendeshin në lokalin “Bon Vivant”.

Policia e Kosovës ka njoftuar më 11 gusht se ka shpallur në kërkim Dukagjin Nikollajn, nën dyshimin se ai ka kryer katër vepra të ndryshme penale dhe se i njëjti dyshohet se ishte i përfshirë edhe në rastin e ‘Bon Vivant’. I njëjti ende gjendet në kërkim.

Në kërkesën fillestare për paraburgim të përpiluar nga prokurorja Dulina Hamiti shpjegohet momenti kur palët nxorën armët e zjarrit dhe filluan të gjuajnë në njëri-tjetrin.

Fillimisht Kastriot Ramadani me të vërejtur se në lokal kishin hyrë Andi Pajaziti e Gëzim Zakuti nxjerr armën e zjarrit nga brezi, e njëjtë kishte vepruar edhe Dukagjin Nikollaj, i cili nxjerr armën nga një çantë që e mbante me vete, ku për një moment fillojnë të përleshen fizikisht Pajaziti me të pandehurin Nikollaj.

Tutje, sipas dosjes së Prokurorisë, Kastriot Ramadani më një shishe qelqi godet në kokë disa herë të pandehurin Andi Pajaziti, e ky i fundit me armë zjarri shkrep në drejtim të Kastriot Ramadanit. Edhe Kastriot Ramadani kundërpërgjigjet më armë zjarri, por nuk është i vetmi, pasi që edhe Nikollaj gjuan me armë zjarri në drejtim të Pajazitit.

Veprime këto që sipas Prokurorisë kanë rrezikuar jetën edhe të personave të tjerë të cilët kishin pësuar lëndime trupore nga predhat e armëve të zjarrit.

Të plagosur të tjerë kishin mbetur edhe Andi Pajaziti e Hisni Gecaj ndërsa plagëve të armës së zjarrit nuk kishte arritur t’u mbijetonte Kastriot Ramadani, i cili kishte vdekur në QKUK.

13 persona sipas Prokurorisë ishin lënduar nga gotat e thyera të qelqit gjatë përpjekjes për t’u larguar nga vendi i ngjarjes.

Andi Pajaziti, sipas Prokurorisë, po dyshohet se ka kryer veprën penale – vrasje e rëndë.

Vepër penale e cila sipas Kodit Penal të Kosovës është e dënueshme me jo më pak se 10 vite dënim me burgim ose me dënim me burgim të përjetshëm.

Pajaziti, sipas Prokurorisë, dyshohet edhe për përdorim të armës apo mjetit të rrezikshëm dhe shkaktim i rrezikut të përgjithshëm.

Në kërkesën për caktimin e masës së paraburgimit Pajaziti del të jetë recidivist i shumë veprave penale.

Të gjitha raportimet e tjera lidhur më këtë rast, mund t’i lexon në këtë LINK.