Hysri Peqani - 'Burdushi'
'Burdushit' i parashkruhet lënda për mashtrim
Dy herë ishte shpallur fajtor nga Gjykata e Prizrenit për veprën penale të mashtrimit.
Në të dy rastet Gjykata e Apelit e kishte kthyer rastin në rigjykim.
Ndërsa kur po pritej të zhvillohej gjykimi i tretë ndaj të akuzuarit Hysri Peqani, i njohur si ‘Burdushi’, atij i është parashkruar lënda.
Parashkrimi absolut apo vjetërsimi i lëndës nënkupton që ndaj tij ndërpritet çdo ndjekje penale dhe ndërpriten çdo procedurë penale që është duke u zhvilluar ndaj tij për aktakuzën për veprën penale të mashtrimit.
Kallxo.com mëson se pasi që Gjykata e Apelit për herë të dytë e ka kthyer rastin në rigjykim, kanë dështuar të mbahen tri seanca gjyqësore, kjo pasi që në këto seanca nuk është paraqitur i akuzuari Peqani, duke e arsyetuar mungesën e tij me pandeminë COVID-19.
Kështu 5 vite pas ngritjes së aktakuzës, dhe pas dy gjykimeve të zhvilluara, ndërpritet çdo procedurë gjyqësore dhe ndjekje penale për rastin në fjalë.
Historiku i gjykimit
Prokuroria e Prizrenit në vitin 2015 kishte ngritur aktakuzë për vepër penale të mashtrimit ndaj Hysri Peqanit, për një rast të ndodhur në vitin 2014.
Në tetor të vitit 2018 Gjykata e Prizrenit e kishte dënuar me 1 vit burgim efektiv dhe 1,500 euro gjobë Peqanin, mirëpo Gjykata e Apelit e kishte kthyer rastin në rigjykim.
Edhe pas gjykimit të dytë, Hysri Peqani ishte gjetur fajtor, dhe ishte dënuar me 1 vit burgim dhe gjobë në shumën prej 5,000 euro.
Pos gjobës dhe burgimit gjyqtari i rastit Fatmir Krasniqi të njëjtit i kishte shqiptuar edhe dënim plotësues, që t`i ndalohej ushtrimi i profesionit në kohëzgjatje prej 3 vitesh.
Përsëri Gjykata e Apelit e ktheu rastin në rigjykim, ndërsa gjykimi i tretë ndaj Burdushit nuk arriti të zhvillohej si pasojë e parashkrimit absolut të rastit.
Përveç këtij rasti, ‘Burdushi’ kishte qëndruar një kohë të gjatë në paraburgim, dhe ndaj tij po zhvillohet hetim edhe për kryerjen e 4 veprave penale, ndërsa në janar të këtij viti i njëjti ishte liruar nga masa e paraburgimit.