Albin Kurti, Foto: Qeveria e Republikës së Kosovës
Zgjedhjet e Serbisë në Kosovë, Kurti: Nuk mund të veprojmë në kundërshtim me ligjshmërinë dhe kushtetutshmërinë e vendit
Serbia të dielën më 3 prill mban zgjedhjet presidenciale dhe parlamentare. Përmes deklarimeve, zyrtarët shtetëror serb kërkuan që ato të mbahen edhe në Kosovë, siç janë mbajtur edhe në të kaluarën.
Por, një gjë e tillë po kundërshtohet nga institucionet e Kosovës.
Kryeministri i vendit, Albin Kurti tha se nuk dëshirojnë të pengojnë votimin e personave me dy nënshtetësi, por nuk dëshirojnë as t’i shkelin ligjet e vendit.
“Ne nuk dëshirojmë që t’ia pamundësojmë të drejtën e votës qytetarëve të Republikës sonë që kanë dyshtetësi, por në të njëjtën kohë nuk mund të veprojmë në kundërshtim me ligjshmërinë dhe kushtetutshmërinë e vendit”, citohet të ketë thënë Kurti gjatë një takimi virual me ambasadorët dhe shefat e misioneve diplomatike dhe konsullore të Kosovës.
“Ndaj të dyjave do të sillemi me përgjegjësi”, u shpreh kryeministri Kurti derisa tha se është në komunikim të vazhdueshëm me shtetet e QUINT-it.
Kosovë së fundmi nuk lejoi mbajtjen e një referendumi serb në territorin e Kosovës. Për këtë, Kuvendi i Kosovës nxori edhe një rezolutë.
Ndërkohë, ambasadori i Shteteve të Bashkuara të Amerikës në OSBE kishte thënë se “Kosova përcakton kushtet për organizimin e zgjedhjeve të huaja në territorin e saj”.
