Zelensky arrin në SHBA, pritet t’i drejtohet Asamblesë së Përgjithshme të OKB-së
Presidenti ukrainas Volodymyr Zelenskiy tha se ka mbërritur në Nju Jork përpara paraqitjes së tij në asamblenë e përgjithshme të OKB-së dhe takimet në Uashington. Zelenskiy, në një postim në Telegram, tha se tashmë i ka vizituar ushtarakët ukrainas që po trajtohen për lëndime lufte në SHBA. Programi i tij përfshin bisedime me presidentin e SHBA Joe Biden, anëtarë të Kongresit dhe zyrtarë ushtarakë e të biznesit.
Komandanti i forcave tokësore të Ukrainës Gjenerali Oleksandr Syrskyi e ka përshëndetur rifutjen nën kontroll të dy fshatrave lindore, Andriivka dhe Klishchiivka, si një përparim të rëndësishëm që u ka mundësuar trupave të Kievit të shkelnin linjat ruse pranë qytetit të shkatërruar të Bakhmut.
Qeveria ukrainase i ka shkarkuar gjashtë zëvendësministra të mbrojtjes pas emërimit të një ministri të ri të mbrojtjes në fillim të këtij muaji. Qeveria nuk dha asnjë arsye për shkarkimet. Ata që u hoqën nga posti i tyre përfshinin Hanna Maliar, e cila ka lëshuar shpesh përditësime publike mbi luftën e Rusisë kundër Ukrainës. Kyiv Post raportoi se shkarkime të tilla janë standarde kur udhëheqësi i një ministrie ndryshon dhe se disa mund të riemërohen.
Ukraina zyrtare tha se ka ngritur padi në Organizatën Botërore të Tregtisë kundër tre fqinjëve të saj të BE-së – Polonisë, Sllovakisë dhe Hungarisë – për ndalimet e tyre ndaj importeve të grurit ukrainas. Vendet e Evropës Qendrore dolën kundër një vendimi të Komisionit Evropian javën e kaluar për t’i dhënë fund ndalimit të importit.
Rusia nisi një sulm me raketa në qytetin e dytë më të madh të Ukrainës, Kharkiv, të hënën vonë, duke goditur një lagje industriale, ka thënë kryebashkiaku Ihor Terekhov. “Ka informacione për goditjen e një zone industriale në rrethin Kholodnohirsky të qytetit”, sipas Terekhov në Telegram. Nuk ka të dhëna të menjëhershme për viktima apo dëme.
Zyra e presidencës braziliane i ka konfirmuar raportet se presidenti Luiz Inácio Lula da Silva do të takohet me Zelenskiy në margjinat e samitit të OKB-së të mërkurën. Lula e ka mbrojtur krijimin e një grupi kombesh për të ndërmjetësuar në përfundimin e luftës midis Rusisë dhe Ukrainës, por në maj ai deklaroi se Moska dhe Kievi ishin fajtorë për konfliktin, duke zemëruar Kievin, SHBA-të dhe shtetet evropiane që mbështesin Ukrainën.
Një burrë rus që ka jetuar në Hong Kong është arrestuar në SHBA dhe është akuzuar për kontrabandë të sasive të mëdha të mikroelektronikës amerikane, të kategorisë ushtarake në Rusi, tha Departamenti Amerikan i Drejtësisë. Maxim Marchenko dhe dy bashkëpunëtorë rusë të paidentifikuar akuzohen se kanë përdorur kompanitë e tij guaskë për të fshehur prokurimin mashtrues të të ashtuquajturave mikro-ekrane OLED.
Të drejtat e njerëzve në Rusi janë “përkeqësuar ndjeshëm” që nga pushtimi i Ukrainës nga Moska vitin e kaluar, thotë ekspertja e lartë e OKB-së, raportuesja speciale për situatën e të drejtave në Rusi, Mariana Katzarova. Sipas saj, “Situata ka qenë tashmë në një rënie të vazhdueshme gjatë dy dekadave të fundit”.
Një dron që mbante eksploziv që u ul në qytetin bullgar të Tyulenovo u shkatërrua në një shpërthim të kontrolluar, thuhet në një njoftim nga ministria e mbrojtjes së Bullgarisë. Droni u ul të dielën në mbrëmje në qytetin e Detit të Zi që ndodhet 70 km nga kufiri rumun dhe përtej detit nga Krimea.
Shërbimet e sigurisë së Gjeorgjisë e kanë akuzuar një ish-ministër për komplot nga Ukraina për ta përmbysur qeverinë e vendit të Detit të Zi duke organizuar trazira masive. Në një deklaratë, ajo tha se plani i ish-zëvendësministrit të Brendshëm Giorgi Lortkipanidze “do të përfshinte një grup mjaft të madh luftëtarësh gjeorgjianë në Ukrainë dhe një pjesë të rinisë gjeorgjiane”.
Kryediplomati i Kinës, Wang Yi, filloi disa ditë konsultimesh për sigurinë me zyrtarët rusë. Pas bisedimeve me ministrin e jashtëm rus Sergei Lavrov, ministrat u cituan të kenë thënë se çdo përpjekje për ta zgjidhur “krizën” e Ukrainës duhet të marrë parasysh interesat ruse dhe të përfshijë pjesëmarrjen e saj./The Guardian
Përgatiti: Nuhi Shala
