Vranësira e reshje shiu në dy ditët e ardhshme

Instituti Hidrometeorologjik i Kosovës ka njoftuar se edhe gjatë dy ditëve të ardhshme do kemi mot të ngjashëm.

Në njoftim thuhet se të premten parashihen vranësira të përcjellura me shi dhe rrufe.

Këto reshje pritet të jenë më intensive në perëndim dhe veriperëndim të vendit.

“Situatë afërsisht e ngjashme meteorologjike paraqitet gjatë këtyre dy ditëve të parashikimit. Të premten në fushat termike nuk parashihet ndryshim, por që një sistem i vranësirave të dendura parashihet të krijohet gjatë pjesës së dytë të ditës dhe si rezultat i këtij procesi fizik, pritet të ketë reshje shiu të përcjellura me shkarkime rrufesh. Reshjet më intensive parashihen në perëndim dhe veriperëndim të vendit, kurse pjesët tjera do të kenë më pak reshje, sidomos jugu dhe juglindja e vendit, ku mund të ketë vetëm riga të izoluara shiu, derisa një pjesë e madhe e këtij territori nuk do të kenë fare reshje,” thuhet në njoftimin e IHK.

Tutje në njoftim theksohet se temperaturat maksimale gjatë dy ditëve të ardhshme do arrijnë mes 20-26 gradë celcius, kurse ato minimale mes 12-14 gradë.

“Temperaturat minimale do të lëvizin ndërmjet 12-14 gradë Celsius, ndërsa maksimalet e ditës parashihen të lëvizin ndërmjet 20-26 gradë Celsius. Do të fryjë erë nga drejtimi i juglindjes me shpejtësi 1-7 m/s në rrafshin e Kosovës, kurse në pjesën e rrafshit të dukagjinit, shpejtësia e erës do të arrijë deri 14 m/s,” thuhet tutje në njoftim.