Sulmohet me armë zjarri objekti i stacionit policor kufitar në Jasenovik

Policia kufitare e Kosovës është sulmuar me armë zjarri gjatë natës së mbrëmshme në veri të vendit. Sulmi ndaj policisë ka ndodhur në objektin e për mbikëqyrje kufitare në Jasenovik.

“Policia e Kosovës, në këtë rast zyrtarët policorë të cilët kanë qenë me detyrë në stacionin policor kufitar në Jasenovik, kanë informuar se me datë 02 nëntor 2022 gjatë natës kanë dëgjuar të shtëna armesh (dy të shtëna radhazi), përderisa ishin në realizim të detyrave të tyre në vendin e quajtur Jabuke”- thuhet në njoftimin për media të Policisë së Kosovës.

Tutje policia bën të ditur se “Njësia relevante policore ka gjetur një predhë plumbi e cila kishte goditur rrethojën e objektit të stacionit policor për mbikëqyrje kufitare në Jasenovik.  Lidhur me rastin Drejtoria kundër Terrorizmit po kryen hetime mbi dyshimet për kryerjen e veprave terroriste”.

Në njoftim po ashtu thuhet se Policia e Kosovës me njësitet policore, do të vazhdojë angazhimet e saja në realizimin e detyrave dhe autorizimeve ligjore, në ruajtjen e rendit dhe sigurisë publike, parandalimin e krimit dhe kontrabandës si dhe shërbimin ndaj vendit dhe të gjithë qytetarëve pa dallime.