Stuhitë e rrufetë në Kosovë, Instituti Hidrometeorologjik me rekomandime për qytetarët

Instituti Hidrometeorologjik i Kosovës përmes një njoftimi ka dhënë disa instruksione për mënyrën si të veprojnë qytetarët në rastet kur ka shkarkime elektrike-rrufe dhe stuhi.

Ky njoftim nga IHMK vjen pasi tash e dy muaj në Kosovë ka mbizotëruar klimë me reshje, e me raste edhe rrufe.

Gjatë stuhive të mëdha, masat e mëposhtme duhet të merren nëse jeni brenda:

Sigurojë të gjitha pajisjet që mund të fluturojnë larg për shkak të erës së fortë ose shiut të fortë dhe të cilat mund të shkaktojnë dëme materiale ose dëmtim të njerëzve
Siguroni dritaret dhe dyert e jashtme duke i mbyllur të gjitha ato
Shmangni kontaktin me rubinetat e kuzhinës dhe banjës, radiatorët dhe objektet e tjera metalike, pasi ato janë përçues të mirë.

Sipas IHMK-së, nëse jeni jashtë, ndiqni këto udhëzime:

Qëndroni larg çdo strukture të lartë (shtyllat, kullat etj.) dhe mbani në mend se distanca e sigurt është e barabartë me lartësinë e strukturës
Shmangni strukturat e larta, pemët e larta, gardhet, kabllot telefonike dhe linjat e energjisë
Përpiquni të gjeni strehë në një ndërtesë ose në një makinë, dhe nëse kjo nuk është e mundur atëherë uluni në tokë
Shmangni qëndrimin pranë ndërtesave ose makinave në të cilat nuk mund të futeni për strehim
Nëse jeni në pyll, mbroni veten nën degët e pemëve të ulëta – kurrë mos qëndroni nën një pemë të larta në vend të hapur
Shmangni kufirin midis pyllit dhe hapësirës së hapur, preferoni të futeni në pyll
Shmangni fushat e hapura, majat dhe shpatijet malore, brigjet, kanalet apo vende tjera të lagështa
Mos e kaloni ujin, mos notoni
Mos mbani në duart tuaja një ombrellë ose sende tjera përçuese metalike (shkop golfi, shufra peshkimi, etj.)
Shmangni të qenit afër objekteve metalike, biçikleta, pajisje kampingu, etj
Mos qëndroni në këmbë, mblidhuni ose të paktën të përkuleni, pa prekur tokën me duart tuaja, dhe nëse jeni në një grup mbani një distancë prej 5 metrash mes jush.

Nëse e gjendeni në makinë gjatë një stuhie të fortë:

Ndalni makinën pranë rrugës, larg linjave të energjisë dhe pemëve që mund të bien mbi makinë
Qëndroni në makinë dhe ndizni dritat e pozicionit derisa të kalojë stuhia
Mbyllni dritaret dhe mos prekni objektet metalike në makinë
Shmangni rrugët e përmbytura

Distancën nga stuhia mund të vlerësoni përmes hapave të mëposhtëm:

Llogarisni kohën në mes të vetëtimës dhe bubullimës në sekonda
Kohën e llogaritur ndajeni në tre, për të llogaritur distancën e stuhisë në kilometra

Kjo distancë është indikative sepse stuhitë mund të shfaqen shumë shpejt në zonën tuaj.

IHMK potencon se shkarkimet atmosferike janë të rrezikshme, të paparashikueshme dhe siguria asnjëherë nuk garantohet absolutisht.