Foto: KALLXO.com
Spille, shpëtohen nga mbytja në det nënë e bir
19.8.2021 - 18:59
Dy persona, nënë e bir, janë shpëtuar sot nga mbytja në det, në zonën e Spillesë, në Shqipëri.
Sipas njoftimit të Federatës Shqiptare “Vrojtuesit e Plazhit dhe Shpëtimit në Ujë”, nënë e bir kanë qenë duke u mbytur në det kur janë pikasur nga vrojtuesi i plazhit Idajet Roçi.
Ai ka ndërhyrë menjëherë për t’i shpëtuar, duke i nxjerrë në breg më parë nënën e më pas të birin.
Federata tregon se vrojtuesi i plazhit ka rrezikuar jetën e tij në këtë mision.
Sipas Federatës, sot në plazhin e Spillesë deti ka qenë i trazuar dhe sipas tyre vrojtuesi gjatë kohës së ndërhyrjes ka pirë shumë ujë dhe ka shfaqur edhe probleme shëndetësore, për çka është dërguar në spital.