(Arkiv) Foto: KALLXO.com
Situatë e qetë në Mitrovicën e Veriut
Në Mitrovicën e Veriut situata aktualisht është e qetë.
Forcat e Policisë së Kosovës vazhdojnë të jenë të dislokuara në veri.
Ndërsa, mbi urën e Ibrit vazhdojnë të qëndrojnë njësi të Policisë së Kosovës dhe forcave të Karabinierëve, të cilët janë pjesë e KFOR-it.
Sot pasdite janë dëgjuar alarmet, të cilat zakonisht lëshohen nga persona ende të panjohur, por që u bëjnë thirrje banorëve serbë për t’u mbledhur në rastet kur vërehet shtim i forcave të Policisë së Kosovës.
Alarmet sot janë dëgjuar edhe në qytetet e tjera në veri të Kosovës.
Pas këtyre alarmeve ka pasur grumbullim të qytetarëve serbë dhe bllokim të rrugëve.
Policia e Kosovës ka njoftuar se për shkak të bllokimit të rrugëve ka mbyllur për qarkullim pikën kufitare në Jarinjë dhe u ka bërë thirrje qytetarëve që të përdorin pika të tjera kufitare për të hyrë në Kosovë ose për të dalë nga Kosova.
Bllokimi i rrugëve ka ardhur pas njoftimit se nga Policia e Kosovës është arrestuar ish-polici Dejan Pantiq.
Sipas Policisë, Pantiq po dyshohet se ka organizuar sulmin terrorist në zyret e KKZ-së në veri të vendit me ç’rast ishin sulmuar zyrtarët e KQZ-së dhe zyrtarët policorë.
Ministri i Punëve të Brendshme, Xhelal Sveçla, tha se Pantiq akuzohet për kryerjen e veprave terroriste dhe sulm kundër rendit kushtetues të Kosovës.
Vendimin e kanë përshëndetur vendet e QUINT-it.