Shtërpcë, 17 protestues kundër hidrocentralit kërkuan ndihmë mjekësore nga spreji i Policisë
17 protestues nga fshati Biti e Poshtme kanë kërkuar tretman mjekësor në Ambulancën e Shtërpcës për shkak te hedhjes së sprejit nga Policia.
Majori i Policisë në Ferizaj, Mehmetali Hajdini për KALLXO.com ka konfirmuar së janë arrestuar tre persona dhe që zyrtarët policorë janë detyruar të përdorin sprejin për t’i ndaluar protestuesit që mos të futen brenda shiritave të vendosur.
“Protestuesit kanë tentuar me dhunë të hyjnë brenda shiritave qe i ka vendosur Policia, ku me ç‘rast për shkak të mosrespektimit të urdhrave të personave zyrtarë dhe për shkak të prishjes së rendit dhe qetësisë publike janë arrestuar tre persona, ku Policia për t’i ndaluar protestuesit që mos të futen brenda shiritave, ka përdorur sprejin. Personat e arrestuar me urdhër të prokurorit kujdestar, pas intervistimit janë liruar në procedurë të rregullt.”, ka thënë Hajdini.
“Sipas informatave qe posedojmë, diku 17 protestues kanë kërkuar tretman mjekësor në Ambulancën e Shtërpcës për shkak të hedhjes se sprejit”, ka shtuar ai.
Banori i këtij fshati, Jeton Tahiri përmes një video ka deklaruar se Njësia Speciale u ka hedhur sprej qytetarëve, në mesin e të cilëve kishte edhe fëmijë.
Gjithashtu ai pretendon se janë arrestuar një djalë, një vajzë dhe një grua.
“Sot përsëri kanë fillu punimet në lumin Lepenc për më fut ujin në gypa. Banorët e fshatit Biti e Poshtme kanë dalë përsëri që të protestojnë e t’i ndalin punimet. Posa kemi shkuar aty, pas një kohë të shkurtër ka ardhur Njësia Speciale të Policisë së Kosovës dhe i kanë ngjit shiritat gjoja së kah duhet me i hap kanalet me i fut gypat. Pas pak çastesh fëmijët kanë ardhë nga shkolla edhe iu kanë bashkëngjit protestës”, u shpreh Tahiri.
“Fëmijët kanë provu me i ndal së Policia na kanë thanë që brenda këtyre shiritave nuk guxon me hy askush, mirëpo fëmijët që pesë vite që bëjmë luftë me mbrojt lumin iu ka hynë në kokë që duhet të mbrojnë lumin edhe fëmijët kanë hynë brenda shiritave. Njëri prej fëmijëve është rrëzu aty, unë vet personalisht është dashur me kap atë dhe persona të tjerë. Siç duket ka dhënë urdhër komandanti i Njësisë Speciale me na sulmu me sprej që jemi kanë afër shiritave. E kanë arrestua një djalë, një vajzë dhe një grua. Në mesin e njerëzve të cilëve u është hedhur sprej është edhe vajza e vëllait, 6 muajshe, por ka pasur edhe fëmijë edhe më të mëdhenj”, shtoi Tahiri.
