"Amnesty International" i bën thirrje KelKos-it të tërheqë padinë ndaj Shpresa Loshajt dhe Adriatik Gacaferit
“Amnesty International” i ka bërë thirrje kompanisë “KelKos Energy” që të tërheqë padinë ndaj dy aktivistëve mjedisorë, Shpresa Loshaj e Adriatik Gacaferi.
Sipas “Amnesty International”, Loshaj dhe Gacaferi po përballen me padi të pabazuara për shpifje të cilat janë krijuar për t’i frikësuar dhe heshtur ata.
“Shpresa Loshaj dhe Adriatik Gacaferi kanë bërë kampanjë vazhdimisht për të ngritur shqetësimin për ndikimet mjedisore të hidrocentraleve në rajonin e mbrojtur të Deçanit. Këta aktivistë me guxim po qëndrojnë për komunitetin e tyre dhe mjedisin e tyre dhe paditë e “Kelkos Energy” duket se janë një përpjekje cinike për t’i heshtur ata”, thuhet në artikullin e Amnesty International.
“Ne i bëjmë thirrje “KelKos Energy” të tërheqë këto procese gjyqësore dhe autoritet kosovare të sigurojnë që mbrojtësit e mjedisit të mund të shprehin lirshëm shqetësimet e tyre pa pasur frikë nga hakmarrja”, thuhet më tej në këtë artikull.
“”Amnesty International” analizoi dokumentet ligjore dhe materialet e tjera në lidhje me çështjet dhe arriti në përfundimin se proceset gjyqësore mbajnë të gjitha shenjat dalluese të padive Strategjike Kundër Pjesëmarrjes Publike (SLAPP). SLAPP-të po përdoren gjithnjë e më shumë nga qeveritë dhe korporatat në të gjithë botën për të censuruar kritikat dhe për të dekurajuar të tjerët që të mos flasin”, thuhet në këtë artikull.
Në qershor të vitit 2020 “KelKos Energy” akuzoi Loshajn për shpifje.
“KelKos” kërkoi 100 mijë euro dëmshpërblim, si dhe një falje publike.
Në janar të vitit 2020, “KelKos Energy” paditi aktivistin Adriatik Gacaferin për një postim në Facebook në të cilin ai kritikoi veprimet e kompanisë, duke kërkuar tërheqjen e postit dhe 10 mijë euro dëmshpërblim.
Të dyja çështjet janë ende pezull në gjykatat në Kosovë.
Më 21 qershor 2021, “KelKos Energy” i tha Amnesty International se proceset gjyqësore janë mjete për të mbrojtur veten kundër “deklaratave faktike që janë dukshëm të gabuara dhe kanë një ndikim të thellë në biznesin e tyre.
“KelKos Energy” tha se kompania kurrë nuk ka operuar jashtë ligjit ose pa leje të qartë nga rregullatori i energjisë së Kosovës. Ai gjithashtu kundërshtoi pretendimet se hidrocentralet e saj kanë shkaktuar degradim mjedisor, duke vënë në dukje se “KelKos Energy” ka investuar fonde të konsiderueshme në rehabilitimin e mjediseve në rajonin e Deçanit.
Në një deklaratë publike të lëshuar sot, Amnesty International u kërkoi autoriteteve kosovare, përfshirë Ministrinë e Mjedisit, Zyrën e Rregullatorit të Mjedisit dhe komunat përkatëse, të ndërmarrin hapat e nevojshëm për të siguruar që të gjitha komunitetet e prekura nga projekte të mëdha të infrastrukturës në lidhje me shfrytëzimin e burimeve natyrore të kenë qasje në informacion .
“Amnesty International” bëri thirrje që dokumentet në lidhje me konsultimet publike të vihen në dispozicion dhe që publikut t’i ofrohet mundësia për të marrë pjesë efektivisht në procesin e vendimmarrjes.
Organizata gjithashtu nxiti autoritetet të miratojnë ligje dhe politika për të përmbushur detyrimin e tyre për të respektuar dhe mbrojtur të drejtat e njeriut në kontekstin e aktiviteteve të korporatave, përmes rregullimit adekuat, mbikëqyrjes, hetimit, gjykimit dhe ndëshkimeve.
Në muajin prill, Ministria e Mjedisit tha se do të rishikojë të gjitha procedurat e dhënies së licencave ujore, veçanërisht hidrocentraleve.
Paditet aktivistja e mjedisit, kompania “KelKos” i kërkon 100 mijë euro
Padia e KELKOS për aktivistin Gacaferi, mbrojtja kërkon nga Gjykata refuzimin e padisë
